NDI 2022 წლის დეკემბრის გამოკითხვის შედეგებზე დაყრდნობით ამბობს, რომ საქართველოში ნატო-სა და ევროკავშირის მხარდაჭერა კვლავაც სტაბილურად მაღალია.

კვლევის თანახმად, მოსახლეობის 73%-ს მიაჩნია, რომ საქართველო ნატო-ს წევრი უნდა გახდეს, 14% წინააღმდეგია, ხოლო 11%-მა არ იცის.

ამავდროულად, ევროკავშირის მხარდაჭერა გაიზარდა და ჩვეულ ნიშნულს დაუბრუნდა. მოსახლეობის 81%-ს მიაჩნია, რომ საქართველო ევროკავშირის წევრი უნდა გახდეს, 9% წინააღმდეგია, ხოლო ასევე 9%-მა არ იცის.

კვლევა 3 დეკემბრიდან 20 დეკემბრამდე, ქვეყნის მასშტაბით ჩატარებულ, საქართველოს ზრდასრული მოსახლეობის წარმომადგენლობით პირისპირ გამოკითხვის შედეგებს ემყარება (ოკუპირებული ტერიტორიების გამოკლებით). დეკემბერში ჩატარებული გამოკითხვა სულ 2 519 დასრულებულ ინტერვიუს მოიცავს. საშუალო ცდომილების ზღვარი კვლევაში +/-1.6 პროცენტია.