ისრაელის ყოფილი პრემიერ-მინისტრის ნაფტალი ბენეტის თქმით, ომის დასაწყისში რუსეთის პრეზიდენტმა ვლადიმირ პუტინმა დაარწმუნა, რომ უკრაინის პრეზიდენტს ვოლოდიმირ ზელენსკის არ მოკლავდა.

მარტის დასაწყისში, ბენეტი, რომელიც მაშინ ისრაელის პრემიერ-მინისტრის პოსტს იკავებდა, მოსკოვში შუამავლის მისიით გაემგზავრა. მისი თქმით, მან ორჯერ ჰკითხა პუტინს - ხომ არ გეგმავდა პრეზიდენტ ზელენსკის მოკვლას. პუტინმა ორჯერვე უპასუხა, რომ ზელენსკის მოკვლას არ აპირებდა.

ბენეტის თქმით, ამის შემდეგ დაურეკა ზელენსკის.

 „ახლახან წამოვედი შეხვედრიდან. ის არ აპირებს შენს მოკვლას. მან {ზელენსკიმ} მკითხა: „დარწმუნებული ხარ?“, მე ვუპასუხე: „100 პროცენტით. ის არ აპირებს შენს მოკვლას“, - იხსნებს ბენეტი უკრაინის პრეზიდენტთან საუბარს.

ბენეტის მტკიცებით, მაშინ პუტინი ასევე დათანხმდა, რომ არ მოითხოვდა უკრაინის განაიარაღებას.

 „ყველაფერი, რასაც მე ვაკეთებდი {როგორც შუამავალი} შეთანხმებული იყო აშშ-სთან“, - აღნიშნა ბენეტიმ.