უკრაინის შეიარაღებული ძალების მთავარსარდალმა ვალერი ზალუჟნიმ განაცხადა, რომ თავდაცვის ძალებმა ფრონტის ზოგიერთ უბანზე დაკარგული პოზიციები დაიბრუნეს და გამაგრდნენ.

ამის შესახებ ზალუჟნიმ აშშ-ის შეიარაღებული ძალების შტაბების უფროსთა კომიტეტის თავმჯდომარესთან, გენერალ მარკ მილთან სატელეფონო საუბრისას აღნიშნა.

ზალუჟნის თქმით, მარკ მილთან საუბრისას საბრძოლო მოქმედებები განიხილეს.

„დღეს, ყველაზე დაძაბული ვითარება დონეცკის მიმართულებითაა, აქ მტერი ყოველდღე ახორციელებს 50-მდე შეტევას, სასტიკი ბრძოლები გრძელდება უჰლედარისა და მარიინკას მიმართულებით.

ჩვენ საიმედოდ ვაკავებთ თავდაცვას. ფრონტის ზოგიერთ მონაკვეთზე შევძელით ადრე დაკარგული პოზიციების დაბრუნება და გამაგრება. მტრის გამუდმებული ზეწოლის მიუხედავად, გავაგრძელებთ ბახმუტზე კონტროლს და მივიღებთ ზომებს ამ ქალაქის გარშემო ფრონტის ხაზის სტაბილიზაციისათვის“, - განაცხადა ზალუჟნიმ.