რუსეთში ბარნაულის სასამართლომ გამოცემა RusNews-ის ჟურნალისტს მარია პონომარენკოს ექვსი წლით პატიმრობა მიუსაჯა სოციალურ ქსელში მარიუპოლის თეატრის დაბომბვის შესახებ პოსტის გამოქვეყნების გამო. გარდა ამისა, მას ხუთი წლით აეკრძალა ჟურნალისტური საქმიანობა.

ბრალდება 9-წლიან პატიმრობას ითხოვდა.

პონომარენკომ სასამართლო სხდომაზე განაცხადა, რომ თავს დამნაშავედ არ მიიჩნევს და მის მიმართ ლმობიერების გამოჩენის იმედი არ აქვს.

პონომარენკო 2022 წლის აპრილში დააკავეს.

ის დაადანაშაულეს რუსეთის არმიაზე „ყალბი ცნობების გავრცელებაში“, ტელეგრამ-არხზე გამოქვეყნებული პოსტის გამო, რომელშიც საუბარი იყო მარიუპოლის დრამატულ თეატრში მყოფი ადამიანების დაღუპვაზე.

რუსეთმა არაერთხელ უარყო თეატრის დაბომბვა. თუმცა, ის, რომ დრამატული თეატრი, რომელსაც თავს აფარებდა ასობით მშვიდობიანი მოქალაქე, რუსული სარაკეტო დარტყების შედეგად განადგურდა, ეუთოსა და Amnesty International-ის გამოძიებით დასტურდება.