ომის შემსწავლელი ინსტიტუტის (ISW) ანალიტიკოსები ვარაუდობენ, რომ რუსეთის შეტევა დონბასში კულმინაციას აღწევს, უკრაინას კი აქვს შესაძლებლობა ინიციატივა ხელში აიღოს და კონტრშეტევა დაიწყოს.

ანალიტიკოსები აღნიშნავენ, რომ რუსეთის ძალების შეტევითი ოპერაციების ტემპები საომარი მოქმედებების მთელ ტერიტორიაზე ბოლო კვირების განმავლობაში შენელდა, რაც იმას მოწმობს, რომ რუსეთის ძალების გაზაფხულის იერიში დონბასში, შესაძლოა, კულმინაციას მიუახლოვდეს.

ექსპერტები ასევე ხაზგასმით აღნიშნავენ, რომ უკრაინის შეიარაღებულმა ძალებმა, სავარაუდოდ, ჩაატარეს ლოკალური კონტრშეტევა ბახმუტიდან სამხრეთ-დასავლეთით, რუსეთში უკრაინის კონტრშეტევის შესახებ გამწვავებული მსჯელობის ფონზე. ეს მსჯელობები ადასტურებს იმას, რომ „რუსული წყაროები დარწმუნებულნი აღარ არიან რუსი სამხედროების შესაძლებლობაში შეინარჩუნონ ინიციატივა  ბახმუტის გარშემო“.

გარდა ამისა, ინსტიტუტის ანგარიშში აღნიშნულია, რომ უკრაინელი სამხედროები ყურადღებას ამახვილებენ იმაზე, რომ უჰლედარის რაიონში რუსეთის ჯარის უდიდესი დანაკარგები სერიოზულად ასუსტებს რუსეთის შეტევით პოტენციალს დონეცკის ოლქში.

ექსპერტები მიანიშნებენ, რომ „არსებული ქვედანაყოფების სპეციალური აღდგენა უჰლედართან განლაგებისთვის, ასევე ქვებრიგადების ეშელონური სპეციალური ფორმირებების შექმნა, მოწმობს იმას, რომ რუსეთის საბრძოლო შესაძლებლობები დონეცკის ოლქის დასავლეთში მნიშვნელოვნად გაუარესდა“.

სპეციალისტების აზრით, საბრძოლო მოქმედებების ტენდენციების გათვალისწინებით „უკრაინას აქვს ყველა შესაძლებლობა, ხელში აიღოს ინიციატივა და დაიწყოს კონრშეტევა ფრონტის ხაზის კრიტიკულად მნიშვნელოვან მონაკვეთებზე“.