დონეცკის ოლქის ქალაქ ბახმუტში მძიმე ბრძოლები გრძელდება, როგორც იუწყებიან, აქ ფრონტის ხაზი თანდათან დასავლეთისკენ მიიწევს.

უკრაინელმა სამხედრო ექსპერტმა ოლეგ ჟდანოვმა ერთ-ერთი უკრაინული არხის ეთერში განაცხადა, რომ რუსეთის არმიას უპირატესობა არ აქვს ქვეითებში, ქალაქის ქუჩები ბრძოლის დროს ხელიდან ხელში გადადის, რუსებმა ქალაქთან საარტილერიო სისტემები განალაგეს.

ამის გარდა, ჟდანოვის თქმით, ამ მიმართულებით საბრძოლო მოქმედებებში მონაწილეობს 98-ე სადესანტო დივიზიაც.

„ის აქტიურად მონაწილეობს საბრძოლო მოქმედებებში. ის თავის მოქმედებებს კოორდინაციას უწევს „ვაგნერელებთან“. ისინი ცდილობენ დისტანციური ზიანი მიაყენონ ჩვენს ჯარს, შემდეგ კი უტევემ ჩვენს პოზიციებს. ვითარება ძალიან რთულია და კრიტიკულ ზღვარზეა“, - განაცხადა ჟდანოვმა.

უკრაინელი სამხედროები ამტკიცებენ, რომ მათი პოზიციები ბახმუტის გარშემო მასირებულად იბომბება.

უკრაინის თავდაცვის მინისტრის მოადგილის ანა მალიარის თქმით, რუსეთის ძალები ამავდროულად უტევენ ოთხი მიმართულებით - მარინკის, ლიმანის, ავდიივკისა და ბახმუტის.

უკრაინის ხელისუფლების ინფორმაციით, უკრაინის ძალების მიერ კონტროლირებად ქალაქ ავდიივკაში დარჩენილია მხოლოდ 1 800 მცხოვრები.

ავდიივკა ერთ-ერთი უკაინული ქალაქია აღმოსავლეთ უკრაინაში, რომელიც ყველაზე ძალიან დაზარალდა. დონეცკის ოლქის გუბერნატორის პაველ კირილენკოს თქმით, რუსებმა ავდიივკა ნანგრევებად აქციეს.