აქტიურად ვმუშაობთ, როგორც ფინანსური პოლიცია, ასევე შინაგან საქმეთა სამინისტრო და სხვადასხვა უწყება, რომ „ქოლცენტრები“ მაქსიმალურად დაიხუროს და აღარ იფუნქციონიროს საქართველოში, – ამის შესახებ საქართველოს შინაგან საქმეთა მინისტრმა, ვახტანგ გომელაურმა „ქოლცენტრებთან“ დაკავშირებით განაცხადა.

„კავშირები ვისთან აქვთ, ამაზე დეტალებში არ ჩავალ, დაველოდოთ გამოძიებას და ალბათ ფინანსური პოლიცია გააკეთებს ამაზე განცხადებას“, – აღნიშნა მინისტრმა.

მან კომენტარი გააკეთა ოპონენტების ბრალდებაზე, რომ შეუძლებელია „ქოლცენტრების“ არსებობა არ სცდონოდა ხელისუფლებას და არ ყოფილიყვნენ მფარველები

„პასუხი ის მაქვს, რომ ჩვენ თუ ვმფარველობთ და ჩვენი თუა, რატომ ვკეტავთ მაშინ, გიჟები ვართ, თუ რა ვიცი. ჩვენ ვააშკარავებთ, გუშინ ჩვენ გამოვააშკარავეთ. ასე რომ, ეს, რა თქმა უნდა, ტყუილია“.

ამასთან, დავით კეზერაშვილთან დაკავშირებული კითხვის პასუხად მინისტრმა განაცხადა, რომ მის საქმეს გენერალური პროკურატურა იძიებს.

„მე არ ვიძიებ მაგ საქმეს, ამაზე დაელოდეთ პროკურატურას. გენერალური პროკურატურა მუშაობს, ოცი უწყება ხომ არ იმუშავებს ერთ საქმეზე? დაელოდეთ და გეტყვიან პასუხს“, – განაცხადა გომელაურმა.