უკრაინის პრეზიდენტის ადმინისტრაციის ხელმძღვანელის ანდერი ერმაკის ინფორმაციით, 25 მაისს უკრაინამ რუსეთის ტყვეობიდან 106 სამხედრო გაათავისუფლა, რომლებიც ბახმუტის მიმართულებაზე იბრძოდნენ. მათ შორის 8 ოფიცერი და 98 სერჟანტია.

„ისინი იბრძოდნენ ბახმუტისთვის გმირულად, მათმა გმირობამ მტერს არ მისცა შესაძლებლობა ჩვენი აღმოსავლეთით სიღრმეში წასულიყვნენ. თითოეული მათგანი ჩვენი სახელმწიფოს გმირია“, - ამბობს ერმაკი.

ერმაკის თქმით, გათავისუფლებულ სამხედროებს შორის ბევრია ისეთი, რომლებიც უგზოუკვლოდ დაკარგულებად იყვნენ მიჩნეული.

უკრაინის დაზვერვის ცნობით, გათავისუფლებულთა შორის დაკარგულად მიჩნეული იყო 68  ჯარისკაცი.

ასევე დაზვერვის ცნობით, უკრაინულ მხარეს გადაეცა სამი ცხედარი - ორი უცხო ქვეყნის მოქალაქის და ერთი უკრაინელის.

გათავისუფლებულთა შორის 98 უკრაინის შეიარაღებულ ძალების წარმომადგენელია, 21 - ტერიტორიული თავდაცვის.

ასევე სახლში დაბრუნდა 7 მესაზღვრე და ერთი ტრანსპორტის სახელმწიფო სპეციალური სამსახურის სამხედრო მოსამსახურე.

სულ მცირე 7 გადარჩენილს აღენიშნება სხეულის სხვადასხვა სახის დაზიანება: ცეცხლსასროლი ჭრილობები, დამწვრობა და მოტეხილობები, ასევე ქრონიკული დაავადებების გამწვავება.

გათავისუფლებულთა შორის ყველაზე უფროსი 59 წლისაა, ყველაზე ახალგაზრდა კი 21-ის.

უკრაინამ ტყვეების გაცვლის ფარგლებში სახლში სულ 2 430 ადამიანი დააბრუნა, მათ შორის 139 სამოქალაქო პირია.