საქართველო და აზერბაიჯანი ტურიზმის სფეროში თანამშრომლობას კიდევ უფრო გააღრმავებენ. მხარეებმა საერთაშორისო ასპარეზზე ორი ქვეყნის პოტენციალის უკეთ წარმოჩენისათვის ერთობლივი ღონისძიებების ორგანიზების შესაძლებლობა უკვე განიხილეს. როგორც საქართველოსა და აზერბაიჯანის პირველი დიპლომატების შეხვედრის შემდეგ გახდა ცნობილი, სამომავლოდ განსაკუთრებული აქცენტი გაკეთდა ტურიზმის სფეროში თანამშრომლობის კიდევ უფრო გაღრმავებაზე და ქვეყნების ტურისტული პოტენციალის დემონსტრირებისთვის ერთობლივი პროექტების განხორციელებაზე.
როგორც საქართველოს ტურიზმის ეროვნულ ადმინისტრაციაში განმარტავენ, აზერბაიჯანი და საქართველო შორეულ ბაზრებზე ერთობლივად წარდგებიან და ერთიანი ძალებით მოახდენენ ქვეყნების პოპულარიზაციას, მით უმეტეს შესაბამისი გამოცდილებაც უკვე არსებობს.

ტურიზმის ეროვნულ ადმინისტრაციში განმარტავენ, რომ ორმა მეზობელმა ქვეყანამ მსგავსი პროექტი აშშ-ს ბაზარზე უკვე განახორციელა, როდესაც აზერბაიჯანი და საქართველო მნიშვნელოვან ტურისტულ გამოფენაზე ერთიანი სტენდით წარსდგა.

სტატისტიკური ინფორმაციის მიხედვით, საქართველოში აზერბაიჯანელი ტურისტების დინამიკა მზარდია. 2015 წელს 2014 წელთან შედარებით საქართველოში აზერბაიჯანელი მოგზაურების რაოდენობა 8,6 %-ითაა გაზრდილი. 2014 წელს 2013 წელთან შედარებით კი 19,3 %-ით.

თუმცა მიუხედავად სტატისტიკური ინფორმაციისა, აზერბაიჯანში მიმდინარე ეკონომიკური მოვლენების ფონზე, საქართველოს ტურისტულ ბაზარს საკმაოდ სკეპტიკურად უყურებენ აზერბაიჯანული ტურისტული კომპანიები.

ასე მაგალითად, აზერბაიჯანული ტურისტული კომპანია „Polar East“-ის ხელმძღვანელი ელენა ხრამცოვა echo.az-თან საუბრისას ამბობს, რომ აზერბაიჯანული მანათის კურსის გაუფასურების გამო საქართველო დაბალბიუჯეტიან მიმართულებად აღარ მიიჩნევა.

„თუ კი ვისაუბრებთ საქართველოზე, აღნიშნული მიმართულება წლების განმავლობაში საკმაოდ დიდი მოთხოვნით სარგებლობდა. ზოგი ამ ქვეყანაში უიკენდებზე რეგულარულადაც კი დადის, რომ აღარაფერი ვთქვათ სხვადასხვა დღესასწაულებზე.

თუმცა აზერბაიჯანული მანათის კურსის გაუფასურების ფონზე, საქართველოს არც თუ ისე დაბალბიუჯეტიან მიმართულებათ მიიჩნევა, როგორც ეს ადრე იყო აღქმული. საბოლოო ჯამში კი მიმზიდველი ადგილები, ხელსაყრელი ფასებით გაიზარდა, რადგანაც ავიაკომპანია Azal-ი მოსკოვბის, სტამბულისა და დუბაის მიმართულებით ბილეთებს საკმაოდ კარგ ფასებში ყიდის“, აცხადებს „Polar East“-ის ხელმძღვანელი.