მოლდოვაში პრორუსული პარტია „შორი“ არაკონსტიტუციურად მიიჩნიეს
მოლდოვის საკონსტიტუციო სასამართლომ მიიღო გადაწყვეტილება, რომ პრორუსული პოლიტიკური პარტია „შორის“ საქმიანობა არ შეესაბამება ქვეყნის კონსტიტუციას. იუწყება BBC.
მოლდოვის მთავრობამ სასამართლოს ხსენებული პარტიის საქმიანობის შესწავლის თხოვნით გასული წლის ნოემბერში მიმართა.
მთავრობის განცხადებით, პარტია ორგანიზებას უკეთებდა მასობრივ საპროტესტო აქციებს ქვეყანაში დესტაბილიზაციისათვის და აქციებზე გამოსასვლელად მოქალაქეებს გარკვეულ თანხას უხდიდა.
სასამართლომ დაადგინა, რომ პარტია მოქმედებდა კანონის უზენაესობის პრინციპების საწინააღმდეგოდ და ემუქრებოდა მოლდოვის სუვერენიტეტსა და დამოუკიდებლობას. პარტია „შორი“ ასევე დაადანაშაულეს რუსეთის ინტერესებიდან გამომდინარე უკანონო საქმიანობაში.
საკონსტიტუციო სასამართლოს თავმჯდომარის განცხადებით, მოლდოვის იუსტიციის სამინისტრო შექმნის კომისიას პარტიის ლიკვიდაციისა და იურიდიული პირების რეესტრიიდან ამოღების შესახებ.
ამასთან, „შორის“ წარმომადგენლები შეინარჩუნებენ მანდატებს პარლამენტში, თუმცა იმუშავებენ, როგორც დამოუკიდებელი დეპუტატები.
