რუსეთში, კამჩატკის ნახევარკუნძულზე ვულკანმა კლიუჩევსკაიამ ლავის ამოფრქვევა დაიწყო. ინფორმაციას „რია ნოვოსტი“ ავრცელებს.

ამოფრქვევა გასულ ღამეს დაიწყო. კამჩატკის ვულკანურ ამოფრქვევებზე რეაგირების   ჯგუფი დაკვირვების საფუძველზე აცხადებს, რომ ახლომდებარე დასახლებებისა და ავიაციისთვის ვულკანი საფრთხეს არ წარმოადგენს.

ვულკანს ჯერჯერობით მინიჭებული აქვს ავიაციისთვის გაზრდილი საფრთხის "ყვითელი" კოდი, რადგან ფერფლის გამოფრქვევა არ დაფიქსირებულა. თუ აქტივობა მნიშვნელოვნად გაიზრდება, ფერფლმა, შესაძლოა, საფრთხე შეუქმნას თვითმფრინავებს.

კლიუჩევსკაია ყველაზე აქტიური ვულკანია ევრაზიაში. მისი აბსოლუტური სიმაღლე დაახლოებით 4 850 მეტრია. ბოლოს ვულკანის ლავის ამოფრქვევა 2020 წლის 30 სექტემბრიდან 2021 წლის 8 თებერვლამდე გრძელდებოდა.