უკრაინაში ჩვენი ელჩი იყო ერთ-ერთი იშვიათთაგანი, რომელიც ომის დაწყების პირველივე დღეებიდან რჩებოდა კიევში და ყველაფერს აკეთებდა, რათა ჩვენი მხრიდან მაქსიმალურად გატარებულიყო უკრაინის ინტერესები, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ ჟურნალისტებს განუცხადა.

„კონსულტაციები ფორმალობაა. პრაქტიკულად, გამოვიდა, რომ არის ელჩი, რომელიც ომის დაწყების დღიდან რჩებოდა კიევში. ძალიან ბევრი ელჩი, მათ შორის უკრაინის სტრატეგიული პარტნიორი ქვეყნების ელჩები გავიდნენ კიევიდან, როგორც კი ომი დაიწყო. უკრაინაში ჩვენი ელჩი იყო ერთ-ერთი იშვიათთაგანი, რომელიც ომის დაწყების პირველივე დღეებიდან რჩებოდა კიევში და ყველაფერს აკეთებდა, რათა ჩვენი მხრიდან მაქსიმალურად გატარებულიყო უკრაინის ინტერესები, იქნებოდა ჰუმანიტარული, პოლიტიკური მხარდაჭერის კუთხით თუ ასე შემდეგ. ელჩი პირველივე დღეებიდან ყველაფერში იყო ჩართული, არ ტოვებდა კიევს, მიუხედავად იმისა, რომ პირდაპირ კიევზე იყო რუსული სამხედრო აგრესია. როდესაც ამ ფონზე, უკრაინის ხელისუფლება იღებს ასეთ გადაწყვეტილებას, ეს არის მიუღებელი და ეს არის შეურაცხმყოფელი“, – განაცხადა ირაკლი კობახიძემ.