სტუდენტური მოძრაობა უნდა აღორძინდეს. სხვანაირად ძველი თაობა ვერ გამოიყვანს ჭაობიდან ქვეყანას, - აცხადებს საქართველოს ეკონომიკური განვითარების ცენტრის ხელმძღვანელი. მისი შეფასებით, თბილისის სახელმწიფო უნივერსიტეტის ანტიოდერული გამოსვლები არის ორი ათეული წლით მივიწყებული სტუდენტური მოძრაობის აღორძინების საწყისი ნიშანი.

”მათ უნდა გაიმარჯვონ არა მხოლოდ ლოკალურად, უნივერსიტეტში, არამედ მთელი ქვეყნის მასშტაბით. ერთხელ და სამუდამოდ უნდა დასრულდეს საქართველოში საზოგადოების პოლიციური კონტროლის რეჟიმი. ოდეერთან ჩემი პირადი ანგარიშსწორებაც მაკავშირებს: ოთხმოცდათიანი წლების დასაწყისში, როცა ეკონომიკურ რეფორმებს ვიწყებდით ( მაშინ ვიცე-პრემიერი ვიყავი), საბჭოთა რეპრესიული და კორუფციული კონტროლის სისტემის გაუქმების გარეშე შეუძლებელი იყო ბიზნესის განვითარება და საბაზრო ნორმების დამკვიდრება. პირადად ჩემი ინიციატივით გაუქმდა ე.წ. სახალხო კონტროლი, ე. წ. ობეხეესი, ე. წ. კრუ ( ფინანსური კონტროლის ინსპექცია). დიდი ომი გადავიტანეთ მაშინ რეფორმატორულმა უმცირესობამ. ერთადერთი აუღებელი ციხე-სიმაგრე სწორედ ოდეერის სისტემა იყო. ვისაუბრეთ მაშინ ამის გაუქმებაზე მე და ირაკლი ბათიაშვილმა( მაშინ უშიშროების მინისტრი იყო და ეს სისტემა მას ექვემდებარებოდა). ისიც თანახმა იყო. ვერაფერს გავხდით. ამის გარეშე არეულ ქვეყანას ვერ ვმართავთო-ასეთი იყო უკლებლივ ყველას პოზიცია-შევარდნაძით დაწყებული, ძალოვანი მინისტრებით დამთავრებული. წავაგეთ ეს ბრძოლა. რას წარმოვიდგენდი, რომ ეს ჯაშუშური სიმახინჯე ვარდების რევოლუციისშემდგომ ხელისუფლებასაც გადაურჩებოდა და დღემდე შემორჩებოდა სახელმწიფო მმართველობას. მე თავისებურად ვიძიე შური ამ წარსულის გადმონაშთზე. როგორც კი ეროვნულ ბანკში მივედი, საინფორმაციო-უსაფრთხოების სამსახურს ამოფარებული ოდეეერის პოსტი გავაუქმე. ეროვნული ბანკი იყო საქართველოში ერთადერთი სახელმწიფო ორგანო, სადაც არ ყოფილა ოდეერი. ჩემი წამოსვლის შემდეგ კვლავ აღადგინეს. ოდეერის სისტემის გაუქმება საზოგადოების გაჯანსაღების გზაზე გადადგმული კიდევ ერთი ნაბიჯი იქნება. რა მინდა ვუთხრა სტუდენტებს: არ დათმოთ. პირველის დაცემას სხვებიც მოჰყვება. მაგალითი გადამდებიაო. სხვებიც მოგბაძავენ. რაც ჩვენ ვერ შევძელით, მოდით, გააკეთეთ თქვენ!”, - ამბობს გოცირიძე,