საფრანგეთის პრეზიდენტმა ემანუელ მაკრონმა ირანის პრეზიდენტ ებრაჰიმ რაისთან სატელეფონო საუბრისას გააფრთხილა არ მოახდინოს ისრაელსა და „ჰამასს“ შორის კონფლიქტის ესკალაცია. ამის შესახებ ელისეის სასახლის მიერ გავრცელებულ განცხადებაშია ნათქვამი.

"პრეზიდენტმა გააფრთხილა პრეზიდენტი რაისი კონფლიქტის ყოველგვარი ესკალაციის ან გავრცელების შესახებ, განსაკუთრებით ლიბანში. "ჰეზბოლასთან" და 'ჰამასთან" ურთიერთობის გათვალისწინებით, ირანს ეკისრება პასუხისმგებლობა ამ კუთხით", - განაცხადეს საფრანგეთის პრეზიდენტის პრესსამსახურში. მათივე განცხადებით, თეირანმა „ყველაფერი უნდა გააკეთოს იმისათვის, რომ თავიდან აიცილოს რეგიონული აფეთქება“.

მანამდე ირანმა, რომელიც ღიად უჭერს მხარს ტერორისტულ დაჯგუფება „ჰამასს", გააფრთხილა ისრაელი "შორსმიმავალი შედეგების" შესახებ, თუ ის გააგრძელებს თავდასხმებს ღაზას სექტორზე. თეირანმა გაავრცელა საჯარო მიმართვები და ისრაელს აცნობა, რომ შესაძლოა კონფლიქტში ჩაერთოს, თუ ისრაელი გააგრძელებს ღაზას სექტორში ჰამასის განადგურებას.