ყველა მძევლის გათავისუფლება საფრანგეთისთვის აბსოლუტური პრიორიტეტია. ჩვენს პარტნიორებთან ერთად ყველაფერს ვაკეთებთ იმისათვის, რომ ყველა მძევალი, კერძოდ, ჩვენი 8 ფრანგი თანამემამულე გათავისუფლდეს, - ამის შესახებ სოციალურ ქსელში წერს საფრანგეთის პრეზიდენტი ემანუელ მაკრონი.

მისი თქმით, ღაზაში დაშავებულ ბავშვებთან დაკავშირებით, საფრანგეთი გამოიყენებს მის ხელთ არსებულ ყველა შესაძლებლობას, რათა უზრუნველყოს 50-მდე დაშავებული ბავშვის საფრანგეთის საავადმყოფოებში გადაყვანა

„გადავწყვიტე, დავიქირავო საჰაერო ძალების ახალი თვითმფრინავი, რომელიც კვირის დასაწყისში ათ ტონაზე მეტ სამედიცინო ტვირთს გადაიტანს. კერძოდ, მას ექნება ორი მობილური სამედიცინო სადგური, სადაც 500-მდე მძიმედ დაშავებულის მკურნალობა იქნება შესაძლებელი. რაც შეეხება დაშავებულ ან ავადმყოფ ბავშვებს ღაზიდან, რომლებსაც ესაჭიროებათ სასწრაფო დახმარება, საფრანგეთი ახორციელებს მის ხელთ არსებული ყველა საშუალების მობილიზებას, განსაკუთრებით საჰაეროს, რათა მათი მკურნალობა საფრანგეთში იყოს შესაძლებელი. გათვალისწინებულია 50-მდე პაციენტის განთავსება ჩვენს საავადმყოფოებში“, – წერს მაკრონი.

მაკრონის თქმით, ოქტომბრის ბოლოს რეგიონში ვიზიტისას გააჟღერა ინიციატივა მშვიდობისა და უსაფრთხოებისთვის, რომელიც ეფუძნება სამ განუყოფელ საყრდენს: 1. საერთაშორისო თანამშრომლობა ტერორიზმის წინააღმდეგ საბრძოლველად; 2. მშვიდობიანი მოსახლეობის დაცვა საერთაშორისო ჰუმანიტარული სამართლის შესაბამისად; 3. ორი სახელმწიფოს პრინციპზე დაფუძნებული გადაწყვეტის განხორციელების პოლიტიკური პროცესის განახლება, ერთმანეთის გვერდით მშვიდობითა და უსაფრთხოდ ცხოვრება.