ბრიტანეთის საგარეო საქმეთა მდივნის დევიდ ქემერონის განცხადებით, ლონდონი განიხილავს შესაძლებლობას, ოფიციალურად აღიაროს პალესტინის სახელმწიფო, ღაზაში ცეცხლის შეწყვეტის შემდეგ, ისე, რომ არ დაელოდოს ისრაელსა და პალესტინელებს შორის მრავალწლიანი მოლაპარაკებების შედეგს.

ლიბანში ვიზიტით მყოფმა ქემერონმა Associated Press-თან განაცხადა, აღიარება ვერ მოხდება, ვიდრე ჰამასი დარჩება ღაზის სექტორში, მაგრამ შეიძლება მოხდეს მანამდე, ვიდრე ისრაელისა და პალესტინელი ლიდერების მოლაპარაკებები პროცესში იქნება.

ქემერონის თქმით, პალესტინის სახელმწიფოს აღიარება, მათ შორის გაეროში, „არ შეიძლება მოხდეს პროცესის დასაწყისში, მაგრამ ეს ასევე არ უნდა მოხდეს პროცესის მიწურულს.

„პალესტინელ ხალხს უნდა მივცეთ ჰორიზონტი უკეთესი მომავლისკენ, საკუთარი სახელმწიფოს მომავლისკენ“, - თქვა კამერონმა და დასძინა, რომ „ეს სასიცოცხლოდ მნიშვნელოვანია რეგიონში გრძელვადიანი მშვიდობის დამყარებისა და უსაფრთხოების განმტკიცებისთვის“.

აშშ, ბრიტანეთი და დასავლეთის სხვა ქვეყნები მხარს უჭერენ პალესტინის სახელმწიფოს დაარსების იდეას, ისრაელის უსაფრთხოების გარანტიებთან ერთად. ისინი აცხადებენ, რომ პალესტინური სახელმწიფოს შექმნა უნდა მოხდეს მოლაპარაკებების გზით. 2009 წლის შემდეგ ამ საკითხზე არსებითი მოლაპარაკებები არ გამართულა.