აშშ-ის ვიცე-პრეზიდენტის ჯეი დი ვენსის განცხადებით, აშშ-ის სამშვიდობო შეთანხმება ითვალისწინებს, რომ უკრაინასაც და რუსეთსაც მოუწევთ იმ ტერიტორიის ნაწილის დათმობა, რომელსაც თითოეული მხარე ამჟამად აკონტროლებს, ასევე საუბარია კონფლიქტის გაყინვაზე ამჟამინდელი კონტაქტის ხაზის გასწვრივ. ამის შესახებ Bloomberg-ი იუწყება.

მისივე თქმით, სადემარკაციო ხაზი, სავარაუდოდ, ზუსტად არ დაემთხვევა ახლანდელ ფრონტის ხაზს, მაგრამ ახლოს იქნება.

„საბოლოოდ, კონფლიქტში ახალი ხაზები გაივლება არსებული ფრონტის ხაზებზე ან სადღაც მათთან სიახლოვეს“, - განუცხადა ვენსმა ჟურნალისტებს.

მისი თქმით, მკვლელობების შესაჩერებლად, ორივე მხარემ უნდა „დაყაროს იარაღი, გაყინოს ეს ყველაფერი და დაიწყოს რეალურად უკეთესი რუსეთისა და უკეთესი უკრაინის მშენებლობა“.

გასულ კვირას აშშ-ის პრეზიდენტმა დონალდ ტრამპმა განაცხადა, რომ მზად არის უარი თქვას უკრაინაში ომის დასრულების მცდელობებზე, თუ შეთანხმება მალე ვერ მიიღწევა.

ვენსმა თქვა, რომ შეერთებულმა შტატებმა „ძალიან მკაფიო შეთავაზება“ გადასცა რუსეთსა და უკრაინას სამშვიდობო შეთანხმების გზაზე.

„დადგა დრო, როდესაც მათ ან უნდა თქვან დიახ, ან შეერთებულმა შტატებმა უნდა დატოვოს ეს პროცესი“, - განაცხადა აშშ-ის ვიცე-პრეზიდენტმა.