ვინც ბედავს და ამბობს, რომ საქართველოში რეპრესიები მიდის, საგამოძიებო კომისიის სხდომებს უყუროს და ნახავს, რა არის რეპრესიები, კანონის დარღვევა, სიცოცხლის მოსპობა, – ამის შესახებ პარტია „ხალხის ძალის“ აღმასრულებელმა მდივანმა, გურამ მაჭარაშვილმა განაცხადა.

„ვინც იმას ბედავს და ამბობს, რომ საქართველოში რაღაცა რეპრესიები მიდის, დროებითი საგამოძიებო კომისიის სხდომებს უყუროს და ნახავს, რა არის რეპრესიები, კანონის დარღვევა, ადამიანის უფლებების დარღვევა, სიცოცხლის მოსპობა, დაზიანება. რაც შეეხება ე.წ. ფონდების დამფუძნებლებს, ამ ფონდების ხელმძღვანელებმა თავად აღიარეს, რომ ისინი ძალადობრივ აქციებს აფინანსებდნენ. უწყებებს საჯაროდ აღიარებული ასეთი მტკიცებულებები აქვთ და, რა თქმა უნდა, ჩხრეკაც მოხდება. ვინმეს შეუვარდნენ და ფიზიკური ძალადობა იყო? რა მოხდა? ფიზიკური იძულება იყო? სახლში ბავშვიც შეიძლება იყოს და ფეხმძიმე ქალბატონიც. კომისიის სხდომას მოუსმინეთ და სიმართლეს გაუსწორეთ თვალები. წინა ხელისუფლების დროს ადამიანებთან ყოველგვარი დასაბუთების გარეშე შედიოდნენ და მაშინ ფიზიკურ განადგურებაზე იყო საუბარი, ფსიქოლოგიურზე აღარ ვსაუბრობ. ეს ადამიანები, რასაც ჰყვებიან, იმასთან დაკავშირებით რეაქცია რატომ არ გაქვთ. ელემენტარულად, რაღაცა ადამიანობა ხომ არსებობს“, – განაცხადა მაჭარაშვილმა.