6 ივნისის ღამეს, უკრაინის დედაქალაქი რუსეთის მხრიდან კიდევ ერთი კომბინირებული თავდასხმის ქვეშ მოექცა.

ნამსხვრევების ჩამოვარდნისა და დარტყმების შედეგად დაზიანდა სამოქალაქო ინფრასტრუქტურის ობიექტები, საცხოვრებელი შენობები, ავტომობილები და მეტროს ლიანდაგები. ოთხი ადამიანი დაიღუპა და 20 დაშავდა.

კიევის საქალაქო სამხედრო ადმინისტრაციის ცნობით, მასშტაბური თავდასხმის შედეგად, ზიანი კიევის სულ მცირე ექვს რაიონს მიადგა.

სოლომენის რაიონში, დაახლოებით 500 კვადრატული მეტრის ფართობის ლითონის ანგარში ხანძარი გაჩნდა. მაშველები ხანძრის ქრობის სამუშაოებს აგრძელებენ. ხანძარი გაჩნდა 16-სართულიანი საცხოვრებელი კორპუსის მე-11 სართულზე. სწრაფი რეაგირების შედეგად, სამი ადამიანი გადაარჩინეს. ხანძარი ჩააქრეს.

დარნიცის რაიონში ჩამოგდებული სამიზნეების ნამსხვრევები სულ მცირე სამ ადგილას ჩაცვივდა.

გოლოსეევის რაიონში, სამოქალაქო ინფრასტრუქტურის ობიექტში ხანძარი გაჩნდა და ხანძრის ჩაქრობის სამუშაოები ამ დრომდე გრძელდება.

დაზიანდა საგანმანათლებლო დაწესებულება. ჩამოგდებული სამიზნის ნაწილები ბენზინგასამართ სადგურთან ახლოს დაეცა, რის შედეგადაც ერთი ავტომობილი დაზიანდა. ნამსხვრევები ასევე არასაცხოვრებელ ზონაში ჩაცვივდა.

დესნიანის რაიონში, ღია ადგილას ჩამოგდებული უპილოტო საფრენი აპარატის ნამსხვრევები იპოვეს.

შევჩენკოვსკის რაიონში ხანძარი არასაცხოვრებელ ზონაში გაჩნდა. დნიპროვის რაიონში კი მნიშვნელოვანი ზიანი მიადგა ბენზინგასამართ სადგურს. ადგილზე მაშველები მუშაობენ.

კიევის მერის ვიტალი კლიჩკოს ცნობით, რამდენიმე ადგილას სამძებრო-სამაშველო სამუშაოები მიმდინარეობს.