მარკო რუბიოსა და სერგეი ლავროვს შორის დაგეგმილი შეხვედრა გადაიდო - CNN
რუსეთის საგარეო საქმეთა მინისტრ სერგეი ლავროვსა და აშშ-ის სახელმწიფო მდივან მარკო რუბიოს შორის დაგეგმილი შეხვედრა ამ დროისთვის გადაიდო.
ამის შესახებ CNN თეთრი სახლის პრესმდივანზე დაყრდნობით იტყობინება.
ტელეარხის ცნობით, უცნობია, თუ რატომ არ გაიმართება შეხვედრა ამ კვირაში.
ამავდროულად, ერთ-ერთი წყარო იტყობინება, რომ რუბიოს და ლავროვს უკრაინაში მიმდინარე ომის შესაძლო დასრულებასთან დაკავშირებით განსხვავებული მოლოდინები ჰქონდათ.
ასევე აღინიშნულია, რომ თავიდანვე არ იყო ნათელი, თუ რა გავლენას მოახდენდა ლავროვსა და რუბიოს შორის წინასწარი შეხვედრა აშშ-სა და რუსეთის პრეზიდენტების მოსალოდნელ სამიტზე ბუდაპეშტში.
20 ოქტომბერს ლავროვსა და რუბიოს შორის სატელეფონო საუბარი შედგა. მხარეებმა განიხილეს შესაძლო „ნაბიჯები პუტინსა და ტრამპს შორის 16 ოქტომბერს სატელეფონო საუბრის დროს მიღწეული შეთანხმებების განხორციელების მიზნით“.
Reuters წყაროებზე დაყრდნობით, წერდა, 23 ოქტომბერს რუბიოსა და ლავროვის შესაძლო შეხვედრის შესახებ პუტინსა და ტრამპს შორის მოლაპარაკებებისთვის მოსამზადებლად.
