კონკრეტულად სერგი კაპანაძესა და რომელიმე არასამთავრობო ორგანიზაციაზე კომენტარს არ გავაკეთებ, ალბათ თავად საფრანგეთის ელჩი ისაუბრებს, ვის რატომ ხვდება, – ამის შესახებ პარტია „გახარია საქართველოსთვის“ პოლიტსაბჭოს წევრმა, ოპოზიციონერმა დეპუტატმა გიორგი შარაშიძემ განაცხადა.

შარაშიძემ ჰკითხეს გავრცელებული ინფორმაციის შესახებ, რომლის თანახმად, „საქართველოს რეფორმების ასოციაციის“ ხელმძღვანელი სერგი კაპანაძე და საქართველოში საფრანგეთის ელჩი ოლივიე კურტო ფარულად შეხვდნენ ერთმანეთს საელჩოში.

„პირადად მე წლების წინ, როდესაც კერძო სექტორში ვმოღვაწეობდი, არაერთ მიღებაზე ვარ ნამყოფი არაერთი ელჩის რეზიდენციაში. ეს ჩვეულებრივი პრაქტიკაა და რაღაც კონსპირაციების ძიება არასწორია. მათ შორის შეიძლება, მესამე სექტორსაც შეხვდეს, მაგრამ ვნახოთ, არ მგონია, რაიმე კონსპირაციული ყოფილიყო. კონსპირაციული რომ ყოფილიყო, როგორღაც სხვა ადგილს გამონახავდა ელჩი და არა საკუთარ რეზიდენციას. საკუთარ რეზიდენციაში შეხვედრების გამართვა ფარულად რამის კეთებას არ ნიშნავს. კონკრეტულად სერგი კაპანაძესა და რომელიმე არასამთავრობო ორგანიზაციაზე კომენტარს არ გავაკეთებ, ალბათ თავად საფრანგეთის ელჩი ისაუბრებს, ვის რატომ ხვდება“, – განაცხადა გიორგი შარაშიძემ.