ზურა გირჩი ჯაფარიძის ციხიდან ამ ფორმით გათავისუფლება სადისტური რეჟიმის სიმხდალის დემონსტრირებაა - შეშინებული რუსი ყველაფრის მკადრებელია და ეს დღეს ჩვენ კიდევ ერთხელ დავინახეთ, - ამის შესახებ სოციალურ ქსელში “ლელო - ძლიერი საქართველოს“ ლიდერი ირაკლი კუპრაძე წერს.

კუპრაძის განცხადებით, “ავტოკრატიული რეჟიმი ცდილობს ქართველი ხალხი დააშინოს, რადგან თავად არის შეშინებული“.

“ვულოცავ ზურას ტყვეობიდან გათავისუფლებას. ვულოცავ შენს ოჯახს, შვილებს.

რაც შეეხება ზურა გირჩი ჯაფარიძის ციხიდან ამ ფორმით გათავისუფლებას, ეს არის სადისტური რეჟიმის სიმხდალის დემონსტრირება. შეშინებული რუსი ყველაფრის მკადრებელია და ეს დღეს ჩვენ კიდევ ერთხელ დავინახეთ.

ზურა და ყველა სხვა პოლიტიკური ლიდერი თუ სინდისის ტყვე, დღეს პატიმრები არ არიან. ისინი ავტოკრატიული რეჟიმის ტყვეები, მძევლები არიან, ისევე როგორც მთელი საქართველო ივანიშვილის რუსული რეჟიმის ტყვე და მძევალია.

ავტოკრატიული რეჟიმი რეალურად ცდილობს დააშინოს ქართველი ხალხი, რადგან თავადაა შეშინებული, თუმცა ჩვენ ის ვერ შეგვაშინებს და ვერც დაგვამარცხებს!“, - წერს კუპრაძე.

ზურაბ ჯაფარიძემ 7-თვიანი პატიმრობის შემდეგ სასჯელაღსრულების დაწესებულება დატოვა. როგორც მან აღნიშნა, რამდენიმე დღის წინ მიღებული ინფორმაციის მიხედვით, პენიტენციური დაწესებულება დღეს, დაახლოებით 10:30 საათისთვის უნდა დაეტოვებინა, რა დროისთვის მისი ოჯახის წევრები და მეგობრები გეგმავდნენ საპატიმრო დაწესებულებასთან მისვლას, თუმცა ციხიდან 08:00 საათზე გამოუშვეს. ჯაფარიძის განცხადებით, ოჯახის წევრებთან დაკავშირებაში მას სასჯელაღსრულების დაწესებულებასთან მდგარი უცნობი ტაქსის მძღოლი დაეხმარა.