„დრუჟბას“ ნავთობსადენი უახლოეს დღეებში ამოქმედდება, რაც ევროკავშირს უკრაინისთვის 90 მილიარდი ევროს სესხის განბლოკვის საშუალებას მისცემს - მარტა კოსი
ევროკომისარმა გაფართოების საკითხებში მარტა კოსმა იმედი გამოთქვა, რომ უნგრეთის მომავალი მთავრობის დახმარებით უკრაინის ევროკავშირში გაწევრიანების მოლაპარაკებების ყველა კლასტერი მალე ოფიციალურად გაიხსნება.
ამის შესახებ მან ევროპარლამენტის საგარეო საქმეთა კომიტეტის წინაშე გამოსვლისას განაცხადა, იუწყება Ukrinform.
„უკრაინა აგრძელებს ევროკავშირში გაწევრიანების გზას განსაკუთრებულ პირობებში. უკრაინელების გადაწყვეტილება, რომ დაიცვან საკუთარი სუვერენიტეტი და მოქალაქეები, მართლაც შთამბეჭდავია. ჩვენ არ ვკარგავთ დროს უკრაინის ევროკავშირში გაწევრიანების გზაზე,“ – თქვა კოსმა.
მისი თქმით, ნავთობსადენი „დრუჟბა“ უახლოეს დღეებში ამოქმედდება, რაც ევროკავშირს უკრაინისთვის 90 მილიარდი ევროს სესხის განბლოკვის საშუალებას მისცემს.
კოსმა ასევე აღნიშნა, რომ ევროკავშირის როგორც გეოპოლიტიკური აქტორის სანდოობა დამოკიდებულია მის უნარზე, გააგრძელოს გაფართოების პროცესი ამბიციურად და სრულად შეესაბამებოდეს საკუთარ წესებს.
კოსის თქმით, რუსეთის აგრესიამ უკრაინის წინააღმდეგ ევროპას შეახსენა, რომ მშვიდობა, სტაბილურობა და დემოკრატია არ არის გარანტირებული და ავტორიტარული რეჟიმები ხშირად ცდილობენ დემოკრატიების შიგნიდან დასუსტებას. მისი თქმით, ამ კონტექსტში გაფართოება აღარ არის მხოლოდ ევროპული პროექტის დასრულება, არამედ მისი დაცვა და გამყარება.
