ჩინეთის საგარეო საქმეთა სამინისტრომ განაცხადა, რომ ჩინეთის პრეზიდენტი სი ძინპინი მიმდინარე წლის შემოდგომაზე აშშ-ს ეწვევა, ამერიკის პრეზიდენტ დონალდ ტრამპის მიწვევით. პეკინმა ამ კვირაში გამართული სამიტი „ისტორიულად“ და შინაარსობრივად მნიშვნელოვან შეხვედრად შეაფასა.

„ეს მნიშვნელოვანი შეხვედრა იყო, რომლის დროსაც ორი ქვეყნის ლიდერებმა სიღრმისეული კომუნიკაცია გამართეს და მნიშვნელოვან შედეგებს მიაღწიეს“,- განაცხადა ჩინეთის საგარეო საქმეთა მინისტრმა ვან იმ.

.მისივე თქმით, ეს „ისტორიული შეხვედრა“ იყო. განსაკუთრებით გაუსვა ხაზი სავაჭრო-ეკონომიკურ საკითხებში მიღწეულ პროგრესს.

ვან ის განცხადებით, სავაჭრო მოლაპარაკებების მონაწილეებმა მიაღწიეს „საერთო ჯამში დაბალანსებულ და პოზიტიურ შედეგებს, მათ შორის წინა კონსულტაციებზე მიღწეული ყველა შეთანხმების გაგრძელებით“. ჩინეთმა და აშშ-მ განიხილეს „სოფლის მეურნეობის პროდუქციის ბაზარზე დაშვების საკითხები“ და ვაჭრობის გაფართოება ორმხრივი ტარიფების შემცირება. მისი თქმით, ორი ქვეყანა ასევე შეთანხმდა სავაჭრო და საინვესტიციო საბჭოების შექმნაზე.

ირანში მიმდინარე ომთან დაკავშირებით ვან იმ განაცხადა, რომ „.ჩინეთი მოუწოდებს როგორც აშშ-ს, ისე ირანს, გააგრძელონ უთანხმოებებისა და დავების, მათ შორის ბირთვული საკითხის, მოლაპარაკებების გზით გადაწყვეტა და მხარს უჭერს ორმუზის სრუტის რაც შეიძლება მალე გახსნას ცეცხლის შეწყვეტის შენარჩუნების საფუძველზე“.

უკრაინის საკითხზე, საუბრისას, ვან იმ განაცხადა, რომ იმედოვნებს კონფლიქტის რაც შეიძლება მალე დასრულებას.

„ჩინეთი და აშშ მზად არიან, გააგრძელონ კომუნიკაცია და კონსტრუქციული როლი შეასრულონ კრიზისის პოლიტიკური გზით მოგვარების ხელშეწყობაში,“ - განაცხადა ვან იმ.