აჭარას სარეკლამო ტურის ფარგლებში ყაზახი ჟურნალისტები და ტურისტული სააგენტოები სტუმრობენ. ორდღიანი ვიზიტისას რეგიონის სტუმრები ბათუმის ღირსშესანიშნაობებს დაათვალიერებენ, მაღალმთიან აჭარასა და ტრადიციულ სამზარეულოს გაეცნობიან. ისინი ასევე შეხვდებიან ადგილობრივი ტურ სააგენტოებისა და სასტუმროების წარმომადგენლებს სამომავლო თანამშრომლობისა და კავშირების დამყარების მიზნით.

სარეკლამო ტურის მონაწილეები ბათუმში ჩამოსვლამდე თბილისის ტურისტულ პოტენციალსაც გაეცნენ. ისინი საქართველოში აჭარის ტურიზმის დეპარტამენტისა და ტურიზმის ეროვნული ადმინისტრაციის ორგანიზებით იმყოფებიან. ყაზახეთიდან სარეკლამო ტურის მოწყობა ყაზახური ავიაკომპანია „SCAT”–ის მიერ ბათუმში ქალაქ აქტაუდან დაგეგმილ ავიაფრენებს უკავშირდება, რომელიც მიმდინარე წლის ივნისიდან დაიწყება. სარეკლამო ტურის მონაწილეებს შორის ავიაკომპანია „SCAT”–ის ვიცე პრეზიდენტი, საზოგადოებასთან ურთიერთობისა და ტურისტული მიმართულებების განყოფილებების უფროსებიც იმყოფებიან. ინფო ტურის მონაწილეები აჭარას 18 მარტს დატოვებენ.

აჭარაში ყაზახი ტურისტების რაოდენობა მზარდია, რაც ერთის მხრივ აჭარის ტურიზმის დეპარტამენტის მიერ ყაზახეთში ჩატარებული მარკეტინგული კამპანიების დამსახურებაა. გასულ წელს რეგიონს 2014 წელთან შედარებით 3,5 პროცენტით მეტი ყაზახი ტურისტი სტუმრობდა, მიმდინარე წელს კი დეპარტამენტი ამ ციფრის გაზრდას ვარაუდობს.