"გასაოცარი დემოკრატიის მეოთხე წელი, რომელიც, ბიძინა ივანიშვილის თქმით , უნდა ყოფილიყო საუკეთესო. მან თავისი გადაწყვეტილებით, რუსთავი 2 დახურა. ის, რომ მაუწყებლობას ვაგრძელებთ, არ ნიშნავს, რომ ხელისუფლება ყველაფერს არ აკეთებს იმისათვის, რომ მაუწყებლობა შევწყვიტოთ. დღეს, როგორც არასდროს, ახლოს ვართ მაუწყებლობის შეწყვეტასთან," - ეს განცხადება რამდენიმე წუთის წინ რუსთავი 2-ის გენერალურმა დირექტორმა, ნიკა გვარამიამ, გააკეთა. 

გვარამიამ აღნიშნა, რომ ტელეკომპანიას გადაკეტილი აქვს ყველა ფინანსური არხი. 

"ტელევიზია არის კონსიგნაციური ბიზნესი. ის როცა ყიდის სარეკლამო დროს, რამდენიმე თვეში აქვს მას შემოსავალი. ამ პაუზის ამოსავსებად საბანკო რესურსია აუცილებელი, განსაკუთრებით, ზაფხულში და ახალი წლების პერიოდში. ამ დროს ბანკის დახმარებით ვყიდულობდით ტექნიკას და ვისტუმრებდით ხელფასებს. ხელისუფლებამ და მის მიერ მოგონილმა წაქეზებულმა პერსონაჟმა ქიბარ ხალვაშმა ყველაფერი გააკეთეს, რომ ეს გზა ჩაგვკეტვოდა. თუ ვინმეს ეჭვი ეპარებოდა რომ ეს ხელისუფლების თამაშია, და თუ ვინმე ფიქრობდა, რომ, იქნებ, ქიბარ ხალვაში იბრძვის თავისი საკუთრებისთვის, ეს ეჭვები დღეს ხელისუფლებამ გაფანტა. ხელისუფლებამ დღეს შეგვიზღუდა ერთადერთი დარჩენილი გზა, გვქონდეს დაფინანსება მაშინ, როდესაც რთული პერიოდები გვაქვს.

6 მილიონის ინვესტიცია მოვიზიდეთ, რომელიც, დიახ, არის დავით კეზერაშვილის ნათესავი. არ გვჭირდებოდა ინვესტორი, ხელისუფლებას ამ დღეში რომ არ ჩავეგდეთ. უბრალოდ სხვა გამოსავალი არ დაგვიტოვეს. ინვესტორი წამოვიდა პირობებზე, რომ არ ჩარეულიყო სარედაქციო პოლიტიკაში და მეორე - ეყიდა, საკმაოდ საფრთხის ქვეშ მყოფი, ქონება. წილების გასხვისება არ შეიძლება. შესაძლებელი იყო მფლობელი კომპანიის შპს საქართველოს წილების გასხვისება. ეს კანონის სრული დაცვით მოხდა. ამის შემდეგ რუსთავი 2 6 მილიონიან ინვესტიციას მიიღებდა, რომელიც არ იქნებოდა მისი ვალი, არც პასუხისმგებლობა. თუ ქიბარ ხალვაში მოიგებდა პროცესს, რუსთავი 2 ს წაიღებდა უფრო მეტი 6 მილიონით გაზრდილი ქონებით.

ხელისუფლებამ ყველაფერი გააკეთა იმისთვის რომ ბოლო გზა გადაეკეტათ ჩვენთვის. საჯარო რეესტრმა 2 დღის განმავლობაში არ დაარეგისტრირა ეს ტრანზაქცია. არადა, მყისიერად უნდა მომხდარიყო. ეტყობა, 2 დღის განმავლობაში ვერ მოახერხეს ივანიშვილთან შეთანხმება. მინისტრი წულუკიანი არ იყო საქართველოში თუმცა ის ამ პროცესებში აქტიურად იყო ჩართული და აუცილებლად აგებს პასუხს. რეესტრმა რეგისტრაცია კი არ მოახდინა, არამედ უკანონო პროცედურა აწარმოა და მოახდინა მესამე პირებთან კომუნიკაცია. ქიბარ ხალვაშის ადვოკატმა ამ შეთანხმების შესახებ არავითარ შემთხვევაში არ უნდა იცოდეს, თუ ეს ინფორმაცია მას არ მიაწოდეს რეესტრიდან. ჩვენ ვხედავთ, რომ ეს მთელი აქცია ხელისუფლების მიერ არის ორკესტრირებული. ქიბარ ხალვაში იბრძვის არა ქონების დასაბრუნებად არამედ ჩვენ წინააღმდეგ და თავისუფალი მედიის წინააღმდეგ. წინააღმდეგ შემთხვევაში, ის არ იტყოდა 6 მილიონიანი ინვესტიციით ტელეკომპანიის გამდიდრებაზე, რომელიც თუ ჰგონია რომ სასამართლოში გაიმარჯვებდა, მას დარჩებოდა. ირონიული და ცინიკურია რომ ეს გადაწყვეტილება იგივე მოსამართლემ გააკეთა.

თამაზ ურთმელიძე თავისუფალი მედიის წინააღმდეგ იბრძვის. ის არის ბიძინა ივანიშვილის დაქირავებული მოსამართლე. მას დიდი ალბათობით, დიდი ოდენობით თანხა აქვს აღებული. მოსამართლე ურთმელიძის ფეხებქვეშ მიწა აუცილებლად დაიწვება, ის ამ ქვეყანაში თავშესაფარს ვერასდროს იპოვის. ღუპავს ქვეყნის მომავალს და ღუპავს ხელუსუფლებას, რომელსაც ემსახურება. ამ ნაბიჯით მოსამართლემ, ფაქტობრივად, რუსთავი 2 დახურა.

ვიმუშავებთ თუ არა უფასოდ, მოვიზიდავთ თუ არა გრანტებს და გაიზრდება თუ არა ჩვენი შემოსავლები, გაიზრდება თუ არა, ჩვენი დამსახურება იქნება და ჩვენ ამის გაკეთება შეგვიძლია. ხელისუფლებას ვპირდები ვიდრე რუსთავი 2 დაიხურება დაიხურებით თქვენ,"- აცხადებს ნიკა გვარამია. 

წყარო: "რუსთავი 2"