ბათუმის მუნიციპალური ინფრასტრუქტურის რეაბილიტაციის პროექტის III ფაზის სამუშაოების ფარგლებში აქტიურად მიმდინარეობს წყალარინების სისტემის რეაბილიტაცია ბარცხანის დასახლებაში. საკანალიზაციო ქსელი უკვე შეიცვალა შრომის, ჭიჭინაძის, ლორთქიფანიძის, აგარაკის ქუჩებზე. სამუშაოები დასასრულს უახლოვდება კაზინეთის ქუჩაზე.
ამ დროისთვის ახალი საკანალიზაციო ქსელის მოწყობა მიმდინარეობს თამარ მეფის ქუჩაზე, სადაც ხორციელდება 300 და 500 მმ-იანი დიამეტრის მილების გაყვანა. მილების ჩალაგება დაწყებულია ქათამაძის ჩიხშიც, სადაც სამუშაოები დაახლოებით 2 კვირაში უნდა დასრულდეს. დღესვე დაიწყება საკანალიზაციო მილების გამოცვლა ნონეშვილის ქუჩაზე.
ბარცხანის დასახლებაში წყალარინების სისტემის სარეაბილიტაციო სამუშაოები გასული წლის დეკემბერში დაიწყო და, ხელშეკრულების შესაბამისად, 28 თვის განმავლობაში უნდა დასრულდეს. თუმცა, სამუშაოები წინსწრებით მიმდინარეობს და სავარაუდოდ ერთი წლის განმავლობაში დასრულდება. ამ დროისთვის, შეცვლილი მილების სიგრძე ჯამში 2 კმ-ს შეადგენს. საკანალიზაციო მილების შეცვლის შემდეგ სისტემა ბარცხანის საკანალიზაციო სატუმბი სადგურის გავლით ცენტრალურ სატუმბ სადგურს მიუერთდება.
ბარცხანაში საკანალიზაციო სისტემის რეაბილიტაციას ტენდერში გამარჯვებული გერმანული კომპანია ,,ფაიფერი და ფაიფერი“ ასრულებს. პროექტის ღირებულება 1 829 350 ევროს შეადგენს.