საქართველოს მთავრობის რეფორმების 4-პუნქტიანი გეგმის ფარგლებში ერთ-ერთი მნიშვნელოვანი მიმართულება ქვეყნის ეკონომიკური განვითარება და სამუშაო ადგილების შექმნაა. სწორედ ეკონომიკური განვითარების ხელშეწყობას ისახავს მიზნად საგადასახადო კანონმდებლობაში დაგეგმილი სიახლეები, რომლებიც მოგების გადასახადის რეფორმას და საგადასახადო ადმინისტრირების გამარტივების მიმართულებით დაგეგმილ ღონისძიებებს ეხება.

საქართველოს ფინანსთა სამინისტრო განაგრძობს აქტიურ კონსულტაციებს ბიზნესთან საგადასახადო კოდექსში მოსალოდნელ ცვლილებებთან დაკავშირებით. მიმდინარე წლის 22 მარტს, ფინანსთა მინისტრი ნოდარ ხადური სხვადასხვა ბიზნეს ასოციაციის წარმომადგენლებს შეხვდა.

შეხვედრაზე კიდევ ერთხელ ხაზი გაესვა რეფორმის მნიშვნელობას ქვეყანაში ეკონომიკური ზრდის ტემპის დაჩქარების, ბიზნესის განვითრებისთვის მეტი შესაძლებლობების გაჩენისა და დამატებითი სამუშაო ადგილების შექმნის მიმართულებით.

შეხვედრაზე ბიზნეს ასოციაციის წარმომადგენლებმა, ფინანსთა სამინისტროს მადლობა გადაუხადეს იმ კომუნიკაციისთვის, რომელიც საკანონმდებლო ცვლილებების განხილვის პროცესში შედგა ბიზნესთან. ამასთან, მათ დააფიქსირეს თხოვნა მოგების გადასახადის რეფორმის მომავალი წლიდან ამოქმედების თაობაზე.

როგორც ფინანსთა მინისტრმა, ნოდარ ხადურმა აღნიშნა, მთავრობისთვის, ფინანსთა სამინისტროსთვის პრიორიტეტულია მაქსიმალურად იქნეს გათვალისწინებული ბიზნესის წინადადებები და შენიშვნები.  მნიშვნელოვანია,  ასევე რეფორმის განხორცილების  გარდამავალ ეტაპზე, ბიზნესს არ შეექმნას რაიმე სახის სირთულეები. სწორედ ამიტომ, საქართველოს მთავრობა, ფინანსთა სამინისტრო, გამოთქვამს მზადყოფნას გაითვალისწინოს ბიზნესის თხოვნა და მოგების გადასახადის რეფორმა ამოქმედდეს 2017 წლის 1-ლი იანვრიდან.

აღნიშნულ პერიოდში რეფორმის ამოქმედება ბიზნესს ხელს შეუწყობს უფრო მომზადებული შეხვდეს მოგების გადასახადის ახალ მოდელს, მინიმუმამდე შეამციროს ის პოტენციური რისკები და ხარვეზები, რომელიც შესაძლოა მოჰყოლოდა რეფორმის მიმდინარე წლის ივლისიდან ამოქმედებას.

 ფინანსთა მინისტრ ნოდარ ხადურის განმარტებით, კანონპროექტით დაგეგმილი ცვლილებები სამ ეტაპად ამოქმედდება:

• პირველ ეტაპზე ეს შეეხება დამატებული ღირებულების გადასახადს - ძირითადი საშუალებების იმპორტის დროს, დამატებული ღირებულების გადასახადის გადახდა საჭირო აღარ იქნება, რაც ასევე გულისხმობს ადმინისტრირების გამარტივებას. აღნიშნული ცვლილება კანონპროექტის მიღებისთანავე ამოქმედდება.

•მეორე ეტაპზე მოხდება მოგების გადასახადის ჩანაცვლება განაწილებული მოგების გადასახადით, რომელიც 2017 წლის 1-ელ იანვარს ამოქმედდება.

•მესამე ეტაპი შეეხება საფინანსო სექტორს, რომელზეც კანონპროექტის გავრცელება 2019 წლის 1-ლი იანვრიდან მოხდება.

აღსანიშნავია, რომ მოგების გადასახადის რეფორმა საქართველოს ეკონომიკის არაერთ მიმართულებაზე მოახდენს დადებით გავლენას:

Ø  დააჩქარებს ეკონომიკურ ზრდას ქვეყანაში

Ø  პოზიტიური გავლენა ექნება ქვეყანაში მიმდინარე ანგარიშის დეფიციტის შემცირების კუთხით

Ø  ხელს შეუწყობს ფინანსურ რესურსებზე კომპანიების ხელმისაწვდომობის ზრდას. განსაკუთრებით, ეს შეეხება მცირე და საშუალო ზომის საწარმოებს

Ø  რეფორმის შედეგად ეკონომიკაში გაიზრდება პროდუქტიულობა;

Ø  გაიზრდება ბიზნესში არსებული აქტივების ლიკვიდურობა;

Ø  გაიზრდება კაპიტალის მოცულობა;

Ø  შემცირდება  გარე ფინანსური შეზღუდვები;

Ø  ბიზნესს ექნება მეტი შესაძლებლობა განვითარებისთვის;

Ø  ჩამოყალიბდება მიმზიდველი კლიმატი ბიზნესის დაწყების და წარმოების კუთხით, რაც გაზრდის ახალი, პოტენციური ინვესტორების დაინტერესებას საქართველოსადმი. შედეგად გაიზრდება ინვესტიციების, მათ შორის, პირდაპირი უცხოური ინვესტიციების მოცულობა;

Ø  გაიზრდება ბიზნესის კრიზისისადმი მდგრადობა;

Ø  გამარტივდება საგადასახადო აღრიცხვა და ადმინისტრირება.

მნიშვნელოვანია, რეფორმა ითვალისწინებს ასევე საგადასახადო ადმინისტრირების გამარტივებას. აღნიშნული ნორმები პარლამენტის მიერ კანონპროექტის მიღებისთანავე ამოქმედდება. კერძოდ:

► საგადასახადო დავის პერიოდში პირის  საბანკო ანგარიშზე ყადაღის დადება განხორციელდება მხოლოდ სასამართლოს თანხმობით;

► საგადასახადო შემოწმებას განახორცილებს მხოლოდ საგადასახადო ორგანო;

► კომპანია, რომელიც ძირითად საშუალებებს იყენებს დამატებული  ღირებულების გადასახადით დასაბეგრ ოპერაციებში, ძირითადი საშუალების იმპორტისას აღარ  გადაიხდის დღგ-ს თანხას;

► გადამხდელებს, რომელთაც აქტივობები არ უფიქსირდებათ, ჩამოეწერებათ:

            2011 წლის 1 იანვრამდე წარმოშობილი და გადაუხდელი დავალიანების თანხა

            2013 წლის 1 იანვრამდე წარმოშობილ დავალიანებაზე დარიცხული სანქციები, ძირითადი თანხის გადახდის პირობით

გარდა ამისა, უახლოეს პერიოდში ბიზნესთან ერთად გაიმართება მსჯელობა ეკონომიკური დარღვევების დეკრიმინალიზაციასთან დაკავშირებულ საკითხებზე.   

საგადასახადო რეფორმაზე მუშაობის პროცესში, ფინანსთა სამინისტრომ შეხვედრები გაიმართა 10-ზე მეტ ბიზნეს ასოციაციასთან და ორგანიზაციასთან, სადაც ბიზნესის წარმომადგენლები გაეცნენ საგადასახადო ცვლილებების ძირითად შინაარსს. აღნიშნული დიალოგის დროს ბიზნესის მხრიდან ცალსახად დადებითად იქნა შეფასებული რეფორმის განხორციელება საქართველოში.