„ეს არის კერძო და საჯარო პარტნიორობის მიმართულება პროფესიული განათლების ნაწილში, სადაც ადამიანები  ბიზნესის სფეროში მოთხოვნად პროფესიებს დაეუფლებიან“, - ამის შესახებ საქართველოს ვიცე-პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა ტექნოლოგიურ პარკში გამართულ პროფესიული განათლების პრეზენტაციის დასრულების შემდეგ ჟურნალისტებს განუცხადა.

პროფესიული განათლების რეფორმის გეგმა საზოგადოებას საქართველოს პრემიერ-მინისტრმა, გიორგი კვირიკაშვილმა წარუდგინა, დეტალური პრეზენტაცია კი საქართველოს განათლებისა და მეცნიერების მინისტრმა თამარ სანიკიძემ გამართა. მინისტრის განცხადებით, პროფესიული განათლების რეფორმა საქართველოს პრემიერ-მინისტრის მიერ ინიცირებული 4-პუნქტიანი გეგმის მნიშვნელოვანი ნაწილია, რომელიც უზრუნველყოფს დამსაქმებლის ჩართულობით საგანმანათლებლო პროცესის წარმართვას, საწარმოო პრაქტიკის კომპონენტის გაძლიერებას და შრომის ბაზარზე ორიენტირებული პროფესიების შერჩევას.

„დღეს ჩვენ მთავრობის 4-პუნქტიან გეგმაში განათლების რეფორმის ნაწილზე ვისაუბრეთ. განათლების სამინისტრომ წარმოადგინა ახალი მიმართულება, რომელიც არის კერძო და საჯარო პარტნიორობის მიმართულება პროფესიულ განათლების ნაწილში, სადაც ადამიანები დაეუფლებიან ბიზნესის სფეროში მოთხოვნად პროფესიებს. აქვე მინდა აღვნიშნო, რომ დაწყებითი ბიზნესის დაფინანსების ინსტრუმენტთან დაკავშირებით ძალიან აქტიურად იმუშავა საპარტნიორო ფონდმა და მასთან ერთად ეკონომიკის სამინისტრომ. უახლოეს დღეებში მთავრობაზე გატანილი იქნება შესაბამისი დადგენილება,  ხოლო შემდგომში გვექნება უკვე ამ პროექტის ოფიციალური პრეზენტაცია“ - განაცხადა დიმიტრი ქუმსიშვილმა.

მინისტრის თქმით,  დღეის მდგომარეობით, უკვე განსაზღვრულია  30-35 მილიონი ლარის მოცულობის ფონდი, რომელიც გადანაწილებული იქნება თბილისზე და რეგიონებზე.  „დაწყებით ბიზნესებს ექნებათ შესაძლებლობა, კომერციული ბანკებიდან უზრუნველყოფის გარეშე აიღონ სესხები იდეის მდგრადობის გადამოწმების შედეგად. ეს არ არის მხოლოდ სტუდენტებზე, ამ წუთის მდგომარეობით,  ეს არის დაწყებით ბიზნესზე, სადაც ახალგაზრდებს პრეფერენციები ექნებათ“ - აღნიშნა ვიცე-პრემიერმა.

ტექნოპარკში გამართულ პრეზენტაციას სახელმწიფო პროფესიული კოლეჯების სტუდენტები, ექსპერტები, დიპლომატიური კორპუსისა და საქართველოს მთავრობის წევრები ესწრებოდნენ.