დღეს, საქართველოს მთავარი პროკურორის მოადგილეები გიორგი გაბიტაშვილი და გიორგი გოგაძე  სტაჟიორთა შესარჩევ კონკურსში წარმატებულ კანდიდატებს შეხვდნენ, კონკურსში გამარჯვება მიულოცეს და სამომავლო პროფესიულ საქმიანობაში წარმატებები უსურვეს. სტაჟიორთა შესარჩევი კონკურსი 2015 წლის ბოლოს გამოცხადდა, რომელშიც მონაწილეობა 1364-მა მსურველმა მიიღო. სამეტაპიანი კონკურსის გავლის შედეგად 62 საუკეთესო კანდიდატი შეირჩა. სტაჟიორებმა გაიარეს ტესტირებები სპეციალობასა და ზოგად უნარებში, ბოლო ეტაპი კი საქართველოს პროკურატურის ორგანოებში სტაჟირების გავლის კომისიასთან გასაუბრება იყო.

საქართველოს პროკურატურის ერთ-ერთ მთავარ პრიორიტეტს კვალიფიციური კადრების მოზიდვა და განვითარება წარმოადგენს. კანდიდატთა შერჩევა მათი პროფესიული ცოდნისა და უნარების საფუძველზე მოხდა. კანდიდატები სტაჟირების პირველ ეტაპზე სპეციალურ სასწავლო მომზადებას გაივლიან. მათი ინტენსიური გადამზადების კურსი მიმდინარე წლის 28 მარტიდან დაიწყება და თვენახევრის  განმავლობაში გაგრძელდება. სწავლების ფარგლებში მონაწილეები მიიღებენ ცოდნას როგორც სისხლის სამართლის, სისხლის სამართლის პროცესის, პროფესიული ეთიკის, საერთაშორისო სამართლის, ადამიანის უფლებების და პერსონალური მონაცემების დაცვის მიმართულებით, ასევე სამართლებრივი წერის, კომუნიკაციის, სასამართლო გამოსვლებისა და სხვა მნიშვნელოვან პროფესიულ თემებთან დაკავშირებით. სასწავლო პროგრამა ორიენტირებულია მსმენელებისთვის იმ პრაქტიკული უნარების განვითარებაზე, რომელიც მათ სამომავლოდ პროფესიული საქმიანობის ეფექტურად განხორციელებაში დაეხმარება. სასწავლო პროცესის დასრულების შემდეგ, წარმატებული მონაწილეები საქართველოს პროკურატურის ტერიტორიულ ორგანოებში განაწილდებიან და ერთწლიან ანაზღაურებად სტაჟირებას გაივლიან. 

საქართველოს მთავარი პროკურატურა სტაჟირების კონკურსს პერიოდულად აცხადებს, რაც დაინტერესებულ პირებს დასაქმებისა და პროფესიული ზრდის რეალურ შესაძლებლობას აძლევს. დღეის მდგომარეობით, პროკურატურის ორგანოებში დასაქმებული 452 პროკურორიდან - 230, ხოლო 93 გამომძიებლიდან - 47  სტაჟირებაგავლილი პირია. საქართველოს პროკურატურაში სტაჟირებით დაიწყეს კარიერა საქართველოს მთავარმა პროკურორმა, მთავარი პროკურორის მოადგილემ, დეპარტამენტის უფროსებმა და მათმა მოადგილეებმა, სამმართველოს უფროსებმა, საოლქო და რაიონულმა პროკურორებმა.