პარლამენტში პერსონალურ მონაცემთა დაცვის ინსპექტორის ანგარიშის მოსმენის პარალელურად, ცოტა ხნის წინ ადამიანის უფლებათა დაცვის კომიტეტის თავმჯდომარემ წარადგინა მის მიერ მომზადებული ინიციატივა, რომელიც ითვალისწინებს ცვლილებებს სისხლის სამართლის კოდექსში და ამ ცვლილებების დამტკიცების შემდეგ, ოჯახური და პირადი საიდუმლოს ხელყოფა გადავა მძიმე დანაშაულის კატეგორიაში, შესაბამისად გაიზრდება სასჯელიც.

პროექტის თანახმად, „სისხლის სამართლის კოდექსის“ 157-ე მუხლიდან პირადი ან ოჯახური საიდუმლოს ხელყოფის გამიჯვნა ხდება.

კერძოდ, კოდექსს ახალი მუხლი ემატება, რომელიც ითვალისწინებს პირადი ან ოჯახური საიდუმლოს ხელყოფაზე მკაცრი სასჯელების განსაზღვრას. პროექტით. პირადი ან ოჯახური საიდუმლოს უკანონოდ მოპოვება, შენახვა, გამოყენება, გავრცელება ან ხელმისაწვდომობის სხვაგვარად უზრუნველყოფა დაისჯება თავისუფლების აღკვეთით ვადით 4-დან 7 წლამდე.

ასევე, პირადი ან ოჯახური საიდუმლოს უკანონოდ გამოყენება და გავრცელება ამა თუ იმ ხერხით გავრცელებული ნაწარმოების, ინტერნეტის, მათ შორის სოციალური ქსელის, მასობრივი მაუწყებლობის ან სხვა საჯარო გამოსვლის მეშვეობით, იქნება დასჯადი თავისუფლების აღკვეთით ვადით 5-დან 8 წლამდე.

თუკი აღნიშნული ქმედება ჩადენილი იქნება ანგარებით, არაერთგზის გამოიწვევს სისხლის სამართლის პასუხისმგებლობას – თავისუფლების აღკვეთით 6-დან 9 წლამდე.

თუკი ზემოთ აღნიშნული ქმედება, ჩადენილი იმ პირის მიერ, რომელსაც სამსახურებრივი მდგომარეობის, პროფესიული საქმიანობის ან სხვა გარემოების გამო ამ საიდუმლოს დაცვა ევალებოდა ან რომელმაც აღნიშნული ქმედება სამსახურებრივი მდგომარეობის გამოყენებით ჩაიდინა – დაისჯება თავისუფლების აღკვეთით 7-დან 10 წლამდე ვადით.