საქართველოს თავდაცვის მინისტრის თინათინ ხიდაშელის განცხადებით, ცენტრალურ აფრიკაში საგამოძიებო ჯგუფი უახლოეს მომავალში გაემგზავრება. აღნიშნულ თემაზე კომენტარი მან ჟურნალისტებთან ვაზიანში ქართველი სამხედროების ავღანეთში გაცილების ცერემონიალის დასრულების შემდეგ გააკეთა.

„თითქმის, დავასრულეთ პროცედურები, გუშინ შევხვდი თავდაცვის სამინისტროს სპეციალურ წარმომადგენელს გაეროში; მოვიწვიეთ ქართველი ექსპერტები, რომლებიც ომის საერთაშორისო სამართალზე მუშაობენ, საერთაშორისო ჰუმანიტარული სამართლის სპეციალისტები არიან და განსაკუთრებული ცოდნა აქვთ ამ მიმართულების. გვინდა, თავიდან ავიცილოთ ნებისმიერი შემთხვევითობა, გვყავდეს ძალიან მაღალი რანგის პროფესიონალები, რომლებიც ჩვენთან ერთად, ჩვენს საგამოძიებო ჯგუფთან ერთად იმუშავებენ. ჯგუფი დაკომპლექტებულია არა მხოლოდ გამომძიებლებით, არამედ, სრულად. სამედიცინო პროცედურები თითქმის დაასრულეს, კვირის ბოლოს დაამთავრებენ აცრებს, შემდეგ ორკვირიანი ვადა არის საჭირო იმისათვის, რომ ამ სამედიცინო პროცედურის ეფექტი ნახონ. გამგზავრება უკვე აპრილის შუა რიცხვებში იგეგმება“, - განაცხადა თავდაცვის მინისტრმა.
თინათინ ხიდაშელის განცხადებით, აღნიშნულ პროცესებთან დაკავშირებით, საზოგადოება ინფორმირებული იქნება. „ძალიან მნიშვნელოვანია ჩვენი სამხედროების სახელი იყოს ზუსტად ისეთივე უმწიკვლო, როგორიც მათი ყოველი საბრძოლო მოქმედება არის სამშვიდობო მისიებსა თუ ქვეყანაში“, - განაცხადა მან.

თავდაცვის მინისტრმა საგამოძიებო ჯგუფისა და მისი მუშაობის შესახებ ისაუბრა და დასძინა, რომ როგორც იურისტს, ჩამოყალიბებული პოზიცია აქვს, იმასთან დაკავშირებით, თუ სინამდვილეში რა მოხდა. ის ელოდება საგამოძიებო ჯგუფის დაბრუნებას. თინათინ ხიდაშელი საქართველოსა და ბრიუსელის არქივების იდენტურობის საფუძველზე მიიჩნევს, რომ თამამად შეიძლება საუბარი სამხედროების უდანაშაულობაზე. „საქართველოში დაცულია არქივი... ბრიუსელში რომ ვიყავით მოგვცეს შესაძლებლობა, სრული წვდომა გვქონოდა არქივზე... აბსოლუტურად, იდენტურია და ემთხვევა ერთმანეთს... ჩვენ შეგვიძლია ახლა ძალიან თამამად ვისაუბროთ იმაზე, რომ ჩვენი სამხედროები, ნამდვილად არაფერ შუაში არიან, მაგრამ დაველოდოთ საგამოძიებო ჯგუფის უკან დაბრუნებას“,- განაცხადა თავდაცვის მინისტრმა.