სახალხო დამცველის აპარატი დღეს, ახალი საინფორმაციო კამპანია სახელწოდებით - „წამზომი ჩართულია“ იწყება, რომელიც ფარული ჩანაწერების გავრცელებას ეხება.

უჩა ნანუაშვილმა დღეს გამართულ ბრიფინგზე განაცხადა,რომ საგამოძიებო ორგანოებმა სწრაფად და ეფექტურად უნდა დაადგინონ და დასაჯონ ის ადამიანები, ვინც უკანონოდ მოიპოვეს, შექმნეს და მიმდინარე წლის 11 მარტს, გაავრცელეს ერთ-ერთი პოლიტიკოსის პირადი ცხოვრების ამსახველი კადრები.

„სახალხო დამცველი იწყებს დღის, საათის და წუთის ათვლას დანაშაულის ჩადენიდან, 2016 წლის 11 მარტიდან დამნაშავე პირების გამოვლენამდე. საზოგადოებამ უნდა იცოდეს 11 მარტს გავრცელებული პირადი ცხოვრების ამსახველი კადრები ვინ შექმნა, გაავრცელა და როგორ მიმდინარეობს ამ საშინელი დანაშაულის გამოძიება. სახალხო დამცველი კამპანიის ფარგლებში პერიოდულად შეახსენებს საზოგადოებას და საგამოძიებო ორგანოებს ამ დანაშაულის თაობაზე გამოძიების მიმდინარეობის შესახებ. გამოძიება უნდა დასრულდეს რაც შეიძლება მალე“, - აღნიშნა სახალხო დამცველმა.