საქართველოს პრეზიდენტის მრჩეველი ეთნიკური უმცირესობების საკითხებში სოფიო შამანიდი  სამცხე-ჯავახეთის უნივერსიტეტს ესტუმრა და პრეზიდენტის სარეზერვო ფონდიდან დაფინანსებულიპროექტის „ახალგაზრდული ინიციატივების ხელშეწყობა ეთნიკური უმცირესობისათვის"  მიმდინარეობას გაეცნო.

პრეზიდენტის ადმინისტრაციასა და სამცხე ჯავახეთის უნივერსიტეტს შორის დადებული მემორანდუმის ფარგლებში, უკვე მეორე წელია ხორციელდება პროექტი, რომელიც მიზნად ისახავს ჯავახეთში მცხოვრები მოსწავლე - ახალგაზრდობის ზოგადი განათლებისა და სამოქალაქო ცნობიერების ამაღლებას, კულტურულ განვითარებასა და ახალგაზრდული ინიციატივების ხელშეწყობას.

პრეზიდენტის მრჩეველი სამცხე-ჯავახეთის უნივერსიტეტის რექტორს და პროექტში ჩართულ თანამშრომლებს შეხვდა. 

„პროექტი შედეგიანი აღმოჩნდა რეგიონის ახალგაზრდებისათვის. ტარდება ლექციები, სემინარები, ექსკურსიები, ახალგაზრდები ემზადებიან მისაღები გამოცდებისთვის.

ვისაუბრეთ, თუ რა უნდა გაკეთდეს, იმისათვის რომ ეთნიკურად სომეხი ახალგაზრდები სასწავლებლად არ წავიდნენ სხვა ქვეყანაში და სწავლა საქართველოს უმაღლეს სასწავლებლებში გააგრძელონ.

პროექტის შარშანდელი მონაწილეების 70%-მა სწავლა სამცხე-ჯავახეთის უნივერსიტეტში გააგრძელა", - განაცხადა სოფიო შამანიდმა.