ნატოსა და რუსეთის თანამშრომლობის განახლების შანსი ჩვეულებრივ რეჟიმში დიდი არ არის. როგორც Defense News-ი წერს,  ამის შესახებ ნატოს გენერალურმა მდივანმა იენს სტოლტენბერგმა  განაცხადა.

მანამდე რუსეთის საგარეო საქმეთა სამინისტრომ 20 აპრილს ბრიუსელის ნატოს შტაბ-ბინაში მუდმივი წარმომადგენლების დონეზე ნატო -რუსეთის საბჭოს სხდომის გამართვა დაადასტურა.  შეხვედრაზე უნდა იმსჯელონ უკრაინის კრიზისისა და რუსეთის საზღვრებთან ნატოს გაზრდილი აქტიურობის შესახებ.

”ეს შეხვედრა წარმოადგენს ჩვენი პოლიტიკური დიალოგის გაგრძელებას. ამავე დროს ჩვეულ საქმის ვითარებას ვერ დავუბრუნდებით, ვიდრე რუსეთი საერთაშორისო სამართლებრივ ნორმებს  პატივს არ სცემს”, - განაცხადა სტოლტენბერგმა.

გენერალური მდივნის თქმით, ალიანსმა ღია დატოვა პოლიტიკური დიალოგისა და სამხედრო კომუნიკაციის არხები. თუმცა მისივე თქმით, რუსეთთან თანამშრომლობის შეწყვეტის გადაწყვეტილება ძალაში რჩება.

ბოლოს დიპლომატები ორი წლის წინ შეიკრიბნენ. რუსეთის მიერ ყირიმის ანექსიის შემდეგ კი, ჩრდილოატლანტიკურმა ალიანსმა რუსეთთან ნებისმიერი ტიპის სამხედრო და სამოქალაქო თანამშრომლობის შეჩერების შესახებ განაცხადა.