რუსთავის მერიაში, ევროკავშირის მიერ დაფინანსებული პროექტის „მონაწილეობითი ადგილობრივი ბიუჯეტირება ქალაქ რუსთავში” პრეზენტაცია მოეწყო. პრეზენტაცია პროექტის კოორდინატორმა რევაზ ბარბაქაძემ წარადგინა. შეხვედრას ქალაქის მერი დავით ჯიქია, მთავრობის ადმინისტრაციის რეგიონებთან ურთიერთობის დეპარტამენტის უფროსის მოადგილე ვაჟა ფანჩულიძე, ქვემო ქართლის გუბერნატორის მოადგილე კახა გუგეშაშვილი, ნიდერლანდების მუნიციპალიტეტების წევრები, ასევე მერიის მრჩეველთა საბჭოსა და არასამთავრობო სექტორის წარმომადგენლები ესწრებოდნენ.

           პროექტს რუსთავის მერია, ნიდერლანდების სამეფოს მუნიციპალიტეტების ასოციაციასა და მუნიციპალიტეტების საერთაშორისო საკონსულტაციო ცენტრთან პარტნიორობით ახორციელებს. მისი მიზანია რუსთავის მუნიციპალიტეტის მხარდაჭერა ქალაქში მონაწილეობითი ბიუჯეტირების პრაქტიკის დანერგვაში, რაც ხელს შეუწყობს ანგარიშვალდებულების გაზრდასა და მოსახლეობის ჩართულობას ქალაქისთვის მნიშვნელოვანი გადაწყვეტილებების მიღების პროცესში. პროექტი მუნიციპალური ადმინისტრაციული სტრუქტურების შესაძლებლობების გაძლიერებას, ასევე ადგილობრივ არასამთავრობო ორგანიზაციებს, საზოგადოებრივ ჯგუფებსა თვითმმართველობას შორის აქტიურ კომუნიკაციასა და მონაწილეობითი ბიუჯეტირების ინსტიტუციონალური მექანიზმების შექმნას ითვალისწინებს.

რუსთავის მოსახლეობას შესაძლებლობა ექნება, მონაწილეობა მიიღოს ადგილობრივი ბიუჯეტის ხარჯვითი პრიორიტეტების განსაზღვრაში და სამოქალაქო მრჩეველთა საბჭოს ინსტიტუტის მეშვეობით ზედამხედველობა გაუწიოს მის შესრულებას.
მოსახლეობისთვის მუნიციპალური სერვისებით სარგებლობის ხელმისაწვდომობისთვის, პროგრამის ფარგლებში, რუსთავში ორი მუნიციპალური შენობაც აშენდება, სადაც სადემონსტრაციოდ შერჩეული სამი ტერიტორიული ერთეული ე.წ. „სერვის პლიუსს“ განახორციელებს.