მოემსახურება თუ არა Georgian Airways-ი  (“აირზენა”) თბილისი-ბათუმის ავიარეისს, ჯერჯერობით უცნობია. როგორც ავიაკომპანიის მენეჯმენტი აცხადებს,  ამ დროისათვის Georgian Airways-ს ბათუმი-თბილისის მიმართულებაზე ოპერირების გადაწყვეტილება მიღებული არ აქვს, რაც თავის მხრივ მრავალ ფაქტორთანაა დაკავშირებული.

როგორც ცნობილია, „საქართველოს აეროპორტების გაერთიანება“ ბათუმი-თბილისის მიმართულებით რეგულარული რეისების განხორციელებისთვის ავიაკომპანიას უკვე ეძებს.

Georgian Airways-ის მენეჯმენტი ამბობს, რომ ბათუმი-თბილისის მიმართულებაზე ამ ეტაპისთვის ჩამოყალიბებულნი არ არიან, თუმც განმარტავენ, რომ მათთვის ეს მიმართულება კომერციულად მომგებიანი არ იყო.

კომპანია, წლების განმავლობაში, თბილისიდან ბათუმის მიმართულებით, ზაფხულის ტურისტულ სეზონზე, რეისებს ყოველდღიურად ასრულებდა. ამ მხრივ Georgian Airways-ი  ბაზარზე ერთადერთი ავიაკომპანია იყო.

შეგახსენებთ, რომ საქართველოს ეკონომიკისა და მდგრადი განვითარების სამინისტროს შპს „საქართველოს აეროპორტების გაერთიანება“ იწვევს ყველა დაინტერესებულ ავიაკომპანიას, რომ გამოხატონ ინტერესი რეგულარული ავიარეისების შესრულების თაობაზე თბილისის შოთა რუსთაველის სახელობის საერთაშორისო აეროპორტიდან ბათუმის ალექსანდრე ქართველის სახელობის საერთაშორისო აეროპორტის მიმართულებით. 

„საქართველოს აეროპორტების გაერთიანება“ დაინტერესებულია გააფორმოს შესყიდვის ხელშეკრულება ავიაკომპანიასთან, რომელიც მზად იქნება განახორციელოს შიდა ფრენები თბილისი-ბათუმი-თბილისის ან ბათუმი-თბილისი-ბათუმის მიმართულებით ყველაზე დაბალ ფასად, წინამდებარე ინტერესთა გამოხატვის პირობების შესაბამისად.

„საქართველოს აეროპორტების გაერთიანებაში“ განმარტავენ, რომ შემოთავაზების ბოლო ვადაა 2016 წლის 5 მაისი.