საქართველოს პრეზიდენტი საფრანგეთში ოფიციალური ვიზიტის ფარგლებში, ელისეის სასახლეში საფრანგეთის პრეზიდენტთან ფრანსუა ოლანდთან შეხვედრას გამართავს.

პრეზიდენტების შეხვედრის დაწყებამდე ვიზიტი საქართველოს პრეზიდენტის ადმინისტრაციის უფროსმა გიორგი აბაშიშვილმა შეაფასა.

მისი განცხადებით, ძალიან მნიშვნელოვანია, რომ მრავალწლიანი პაუზის შემდეგ, ეს არის საქართველოს პრეზიდენტის პირველი ოფიციალური ვიზიტი, თუმცა მანამდე ფრანსუა ოლანდი იმყოფებოდა საქართველოში.

საქართველოს პრეზიდენტის ადმინისტრაციის უფროსის გიორგი აბაშიშვილის განცხადებით, შეხვედრაზე განიხილება ყველა ის აქტუალური პოლიტიკური და ეკონომიკური საკითხი, რომელიც დგას ორი ქვეყნის ურთიერთობების დღის წესრიგში, მათ შორის განსაკუთრებული ყურადღება დაეთმობა ქვეყნის ევროპულ და ევროატლანტიკურ ინტეგრაციის გაძლიერებას და ამ თვალსაზრისით საფრანგეთის მხარდაჭერას და ხელშეწყობას. 

ასევე განსაკუთრებული ყურადრება დაეთმობა, ორმხრივი ეკონომიკური თანამშრომლობის გაღრმავებას, ტურიზმისა და ინვესტიციების თვალსაზრისით.

საქართველოს პრეზიდენტის დელეგაციის შემადგენლობაში არიან საქართველოს პრეზიდენტის ადმინისტრაციის უფროსი გიორგი აბაშიშვილი, ეროვნული უშიშროების საბჭოს მდივანი ირინე იმერლიშვილი, დიასპორის საკითხებში საქართველოს სახელმწიფო მინისტრი გელა დუმბაძე, საგარეო საქმეთა მინისტრის მოადგილე დავით დონდუა, საქართველოს ელჩი საფრანგეთში ეკა სირაძე-დელონი, საქართველოს პრეზიდენტის საერთაშორისო მდივანი თენგიზ ფხალაძე და პოლიტიკური მდივანი ფიქრია ჩიხრაძე.