ბათუმი გრემის მფლობელი ბენდის Maroon 5-ის დასახვედრად ემზადება. კონცერტზე დასასწრები ბილეთების რეალიზაცია www.tkt.ge ზე 25 აპრილიდან დაიწყება, თუმცა კონცერტზე დასწრების სურვილი უცხოელმა ტურისტებმა უკვე დააფიქსირეს.

როგორც "მეტრო თრეველ ჯორჯიას" გენერალური დირექტორი ირაკლი თავართქილაძე აცხადებს, კომპანიის მიერ უკვე შემუშავებულია Maroon 5-ის კონცერტზე მორგებული 3- დღიანი ტურისტული პაკეტები. კომპანია შესაბამის პაკეტებს გაყიდის ყველა სამინზე ბაზარზე, მათ შორის სომხეთში,  აზერბაიჯანში, ყაზახეთში, ბელარუსში, უკრაინაში, რუსეთში, თურქეთში და სხვა.

"მეტრო თრეველ ჯორჯიაში” ადასტურებენ, რომ უცხოელების მხრიდან Maroon 5-ის კონცერტზე დასწრების ინტერესი დიდია. კომპანიამ უკვე მიიღო შესაბამისი შეკვეთები ბელარუსიდან და ყაზახეთიდან.

რაც შეეხება კონცერტზე მორგებული ტურისტული პაკეტების ღირებულებას, ის ინდივიდუალურია, რადგანაც  დამოკიდებულია კონცერტზე დასასწრები ბილეთის ფასზე, სასტუმროს კლასსა და ასევე ფრენის ღირებულებაზე.

რაც შეეხება ადგილობრივ ბაზარს, „მეტრო ჯორჯიას“ შვილობილ კომპანია "მეტრო თრეველ ჯორჯიაში” განმარტავენ, რომ მზარდი მოთხოვნის შემთხვევაში „მეტრო ჯორჯია“ დამატებითი რეისების დანიშვნასაც განიხილავს.

„თუკი მოთხოვნა იქნება ჩვენ გავზრდით რეისების რაოდენობას თბილისი-ბათუმის მიმართულებაზე Maroon 5 -ის კონცერტთან დაკავშირებით. ჩვენ შეგვიძლია ორსართულიანი ავტობუსებიც დავამატოთ და უკვე არსებული რეისებიც 5-დან 8-მდე გავზარდოთ,"-  განაცხადა "მეტრო თრეველ ჯორჯიას" გენერალურმა დირექტორმა ირაკლი თავართქილაძემ.

Maroon 5-ის კონცერტზე დასასწრები ბილეთების ფასი კი ასე გამოიყურება:

40 ლარი - ზონა B
100 ლარი - ოქროს ზონა
200 ლარი - VIP (B)
300 ლარი - VIP (A)

შეგახსენებთ, რომ ბათუმში ჯგუფი Maroon 5-ის კონცერტი 7 ივნისს გაიმართება, კონცერტზე დასასწრები ბილეთების რეალიზაცია კი 25 აპრილის 09:00 საათიდან დაიწყება.

კონცერტი ნაწილია  პროექტისა „Check in Georgia”, რომელიც მასშტაბური კულტურული ღონისძიებების სერიას მოიცავს. როგორც მთავრობაში აცხადებენ, პროგრამა ყოველწლიურად გაფართოვდება და ტრადიციად იქცევა.

აღნიშნული პროექტის განხორციელების მიზანია საქართველო გახდეს რეგიონის კულტურული ცენტრი.

თავის მხრივ კი "Check in Georgia" თავს მოუყრის ქართველ და უცხოელ შემსრულებლებს, მოიცავს 35 ფესტივალს, რომელიც 19 ქალაქში გაიმართება. იხილეთ მცირე ჩამონათვალი: Gem Fest – ელექტრონული მუსიკის ფესტივალი, „შავი ზღვის ჯაზ ფესტივალი“, თბილისის მოდის კვირეული, თბილისის მე-17 საერთაშორისო კინოფესტივალი და ა.შ. #checkingeorgia