მიმდინარე წელს თბილისის საერთაშორისო აეროპორტს მგზავრთნაკადი 21 %-ით გაეზარდა. სამოქალაქო ავიაციის სააგენტოს მონაცემებით, 2016 წლის იანვარ-მარტში თბილისის საერთაშორისო აეროპორტმა 373 ათას 802 მგზავრი მიიღო, 2015 წლის იანვარ-მარტში კი 307 ათას 923 მგზავრი, შესაბამისად ზრდამ 21.39%-ი შეადგინა.

სამოქალაქო ავიაციის სააგენტოს სტატისტიკური ინფორმაციის მიხედვითვე, 2014 წლის პირველ კვარტალში თბილისის საერთაშორისო აეროპორტმა, რეგულარული და არარეგულარული რეისებით,  278 ათას 947 მგზავრის გადაადგილება უზრუნველყო. აღნიშნული მაჩვენებლების მიხედვით კი 2016 წლის პირველ კვარტალში 2014 წლის პირველ კვარტალთან შედარებით საქართველოს მთავარმა აეროპორტმა 34 %-ით მეტი მგზავრი მიიღო.

აღსანიშნავია, რომ 2016 წლის იანვარ-მარტში საქართველოს აეროპორტებით 19.38%-ით მეტმა მგზავრმა ისარგებლა. 2016 წლის პირველ კვარტალში, რეგულარული და არარეგულარული რეისებით, საქართველოს აეროპორტები 432 ათას 949 მგზავრს მოემსახურა.