იუსტიციის უმაღლესი საბჭოს მდივანს ლევან მურუსიძეს მიუღებლად მიაჩნია  არასამთავრობო ორგანიზაციების კრიტიკული ანგარიში. მისი თქმით, თავადაც გააჩნია ინფორმაცია არასამთავრობოების შესახებ, თუ ვინ, ვის უკან დგას.

მურუსიძემ ამის შესახებ არასამთავრობო სექტორის წარმომადგენლის, სოფო ვერძეულის შენიშვნასთან დაკავშირებით ისაუბრა,  თუ რატომ გამოქვეყნდა მხოლოდ ლევან მურუსიძესთან გასაუბრების ამსახველი მასალა და არა მოსამართლეობის სხვა კანდიდატების.

„შევთანხმდეთ და შევხვდეთ, განვიხილოთ ყველა საკითხი. არ გვინდა აგრესიული ტონი, თორემ მეც მაქვს ბევრი ინფორმაცია, მაგრამ ყველაფერი აქ არ ითქმება. მეც მაქვს ინფორმაცია, თუ ვინ დგას ვის უკან, საიდან დაიწყო ყველაფერი, რა და როგორ მოხდა, ვინ დააფინანსა და ა.შ. ამიტომ შევხვდეთ და დავილაპარაკოთ. ყველამ ყველაფერი ვიცით რა ხდება“, - განაცხადა ლევან მურუსიძემ.

არასამთავრობო სექტორმა იუსტიციის უმაღლესი საბჭოს წევრებს დღეს საბჭოს საქმიანობის მონიტორინგის 2015 წლის ანგარიში გააცნო. სხვა ხარვეზებთან ერთად ანგარიშში  მოსამართლეთა შერჩევა-დანიშვნის პროცესში არსებულ დარღვევებზეა საუბარი.

მან არასამთავრობო სექტორს მართლმსაჯულების გაუმჯობესების მიზნით შეხვედრებისა და დისკუსიების გამართვისკენ მოუწოდა.