საკრებულოს ფრაქცია „ნაციონალური მოძრაობა-თბილისის“ თავჯდომარის ირაკლი აბესაძის განცხადებით, ივანიშვილმა ნარმანიას ხელშეწყობით მიისაკუთრა ბოტანიკური ბაღის საკუთრებაში არსებული 40 000 კვ.მ მიწის ნაკვეთი. ამის შესახებ ინფორმაციას აბესაძე „ფეისბუქის“ პირად გვერდზე ავრცელებს.

„ბიძინას თავხედობა, სიხარბე და ,,ქართული ოცნების", თბილისის მერიის მონური მორჩილება უსაზღვრო აღმოჩნდა:
1. ივანიშვილმა ნარმანიას ხელშეწყობით მიისაკუთრა ბოტანიკური ბაღის საკუთრებაში არსებული 40 000 კვ.მ-მდე მიწის ნაკვეთი. 
2. ამ და მიმდებარედ არსებულ ნაკვეთზე ჯამურად 390 000 კვ.მ ლანდშაფტურ-სარეკრეაციო, აქტიური გამწვანების ზონაში დაუშვა მშენებლობა.
3. მერიას შეაცვლევინა და და გადაიტანა კრწანისი-შინდისის მშენებარე გზა, რომლის გამოც უკვე მოჭრილი და გადარგულია 550-მდე ხე, დახარჯული თითქმის 700 000 ლარი იქ არსებული გაზის მილის გადასატანად. აღმოჩნდა, რომ ბუნება გაიჩეხა და საბიუჯეტო სახსრები დაიხარჯა მხოლოდ იმიტომ, რომ ბიძინას რეზიდენციის მშენებლობისთვის გათავისუფლებულიყო პოლიგონი. სხვათაშორის ადგილზე თითქოს სადაც გზის მშენებლობა გადაიტანეს დამატებით 700 ხე უნდა მოიჭრას და გადაირგოს.

მოკლედ, ბიძინამ მიიტაცა და ნადგურდება 390 000 კვ.მ ლანდშაფტური დაცვის ზონა, მათ შორის ბოტანიკური ბაღის ტერიტორია, იჩეხება ათასობით ხე და ეს ყველაფერი მხოლოდ იმიტომ, რომ ბიძინამ ახალი სახლი აიშენოს. ამ კაცს მხოლოდ საკუთარი, პირადი სიხარბე ამოძრავებს და ეს უკვე ძალიან მავნებლურ, საშიშ მასშტაბებშია გადაზრდილი.

P.S. ეს ყველაფერი სამწუხაროდ უკვე დოკუმენტურად დადასტურებული ფაქტებია", - წერს ირაკლი აბესაძე.