,,ჩვენ მხარს ვუჭერთ 2016 წელსვე საარჩევნო კოდექსში ცვლილებების განხორციელებას“ , - ამის შესახებ პრეზიდენტის მრჩეველმა ფიქრია ჩიხრაძემ განაცხადა. მისივე თქმით, საარჩევნო სისტემის რეფორმასთან დაკავშირებით, საკონსტიტუციო ცვლილებებზე მსჯელობაში, პრეზიდენტი და მისი ადმინისტრაცია აქტიურად იყო ჩართული.

,,ეს საკითხები უდავოა, რომ ძალიან მნიშვნელოვანია მომავალი პარლამენტისთვის. იცით, რომ პრეზიდენტი და მისი ადმინისტრაცია ჩართული იყო ამ საკითხზე, როდესაც დებატები და დიალოგი მიდმინარეობდა. მნიშვნელოვანი როლი შეასრულა პრეზიდენტმა. მან  ხელი შეუწყო კონსენსუსის ჩამოყალიბებას არსებული სისტემის უფრო სამართლიანი სისტემით ჩანაცვლების თაობაზე. ამ იდეას არ ეწინააღმდეგება არც მმართველი გუნდი, უბრალოდ მათი პოზიცია, 2020 წელს ხდებოდეს ეს ყველაფერი. ჩვენ ვემხრობით თავდაპირველ ვერსიას, რაზედაც არსებობს სრული კონსენსუსი. უბრალოდ ვამბობთ, რომ არ ღირს, ოთხი წელი დავუკარგოთ საქართველოს, ქართულ დემოკრატიას და არ განვახორციელოთ ის, რაც უმჯობესად გვეჩვენება ქართული სახელმწიფოსთვის“, - განაცხადა ფიქრია ჩიხრაძემ.

მისივე თქმით, დღეს სხვა პოლიტიკური რეალობაა და კოალიციის წევრები უნდა დაფიქრდნენ იმაზე, რომ მხარი დაუჭირონ საარჩევნო კოდექსში 2016 წელს ცვლილებების შეტანას.

„დრო ცოტა რჩება, მაგრამ იმისთვის საკმარისი, რომ საკონსტიტუციო ცვლილებები, თუკი ამის პოლიტიკური ნება იარსებებს რეალურად განხორციელდეს“, - განაცხადა ფიქრია ჩიხრაძემ.