საქართველოს თანაინვესტირების ფონდის სამეთვალყურეო საბჭოს თავმჯდომარემ ირაკლი ქარსელაძემ  29 ჰა ტერიტორიის განვითარებასთან დაკავშირებით ფონდის ხედვებისა და გეგმების პრეზენტაცია მოახდინა.

საქართველოს თანაინვესტირების ფონდი მზად არის საჩუქრად გადასცეს საკუთრებაში გადმოცემის შემდეგ, საჯარო აუქციონის წესით მოპოვებული 29 ჰა მიწის ნაკვეთი თაბორის მთაზე, თუ ამ შეთავაზებიდან ერთი თვის განმავლობაში სხვა იურიდიული პირის მიერ წარმოდგენილი იქნება უკეთესი პროექტი, ქ. თბილისის მერიის მიერ გამოცხადებული საჯარო აუქციონის პირობების სრული დაცვით, რაც გულისხმობს, რომ:

1) ხელშეკრულების გაფორმებიდან არაუგვიანეს 48 თვის ვადაში გამარჯვებულმა განახორციელოს არანაკლებ 80 ნომრიანი სასტუმრო კომპლექსის მშენებლობა, რომლის განაშენიანების ფართი, გარდა ტექნიკური/დამხმარე ფართისა, უნდა იყოს არაუმეტეს 20,000 კვ.მ. (აუქციონის შედეგად მოპოვებული მიწის ნაკვეთის 7%).

2) სასტუმრო კომპლექსისთვის უზრუნველყოს არანაკლებ 50 ერთეულ სატრანსპორტო საშუალებაზე გათვლილი ავტოსადგომის მოწყობა.

3) ხელშეკრულების გაფორმებიდან სააუქციონო პირობების (ვალდებულებების) შესრულებამდე პერიოდის განმავლობაში, პროექტის ფარგლებში განახორციელოს გადაცემულ მიწის ნაკვეთზე მწვანე ნარგავების მოვლა-პატრონობა, განახლება (ახალი ხე-ნარგავების შერგვა), ტერიტორიის კეთილმოწყობა, რეკრეაციული სივრცის განვითარება და საირიგაციო სისტემის მოწყობა.

29 ჰექტარზე დამატებით, ფონდის მიერ გაჟღერებულ იდეაზე უკეთესი იდეის წარმომდგენ იურიდიულ პირს ასევე საჩუქრად გადაეცემა ზემოაღნიშნული ნაკვეთის მიმდებარედ არსებული 10 ჰა მიწის ნაკვეთიც.

შემოთავაზებით დაინტერესბეულმა იურიდიულმა პირებმა ფონდს უნდა წარუდგინონ სრულყოფილი წინადადება, შესაბამისი ფინანსური გათვლები და მათი უზრუნველყოფის დამადასტურებელი დოკუმენტაცია.