გიორგი ვაშაძემ „ერთიანი ნაციონალური მოძრაობა" დატოვა, - ამის შესახებ განცხადება დეპუტატმა რამდენიმე წუთის წინ, პარლამენტის შენობაში გააკეთა.

ვაშაძის თქმით, მან პარტია დატოვა, პოზიციებისა და ინტერესების შეუთავსებლობის გამო.

„საქართველო ურთულეს მდგომარეობაშია, რაც გამოწვეულია ივანიშვილის რეჟიმის უუნარობით და აშკარამავნებლობით. ადამიანებმა დაკარგეს ხვალინდელი დღის რწმენა და იმედი და ყველგან, აბსოლუტურად არის უპერსპექტივობის და უიმედობის განცდა. ეს ყველაფერი გამოწვეულია იმით, რომ საქართველოს მართავს ივანიშვილის ჯიბის მთავრობა. ჩვენი მიზანია მოქალაქეებს გავუჩინოთ პერსპექტივა და რეალური შესაძლებლობები განვითარებისთვის, დასაქმებისა და უკეთესი მომვალისთვის. ამისთვის საჭიროა ივანიშვილის მთავრობა ერთხელ და სამუდამოდ დავასრულოთ და საქართველოში დავიწყოოთ სრულიად ახალი აღმავლობის პროცესი. ამის გაკეთება შეუძლია მხოლოდ ახალი თაობის ენერგიულ და მიზანდასახულ და თავისუფალ ძალას.

ჩემთვის ეს მარტივი გადასაწყვეტი არ იყო ძალიან დიდი ხანია ვფიქრობ ამასთან დაკავშირებით და კიდევ ერთხელ ვამბობ, მე არ მჭირდება უბრალოდ პარლამენტის მანდატი და სკამი პარლამენტში. მე მინდა წარმატებული საქართველო და ამას აუცილებლად გავაკეთებ“, - განაცხადა ვაშაძემ.