დღეს,სასტუმრო „ქორთიარდ მარიოტში", საქართველოს პროკურატურამ არასრულწლოვანთა მართლმსაჯულების თემაზე კონფერენცია გამართა. ღონისძიება საქართველოს მთავარმა პროკურორმა ირაკლი შოთაძემ გახსნა. იუნისეფისა და ევროკავშირის მხარდაჭერით ჩატარებულ კონფერენციას მთავარი პროკურორის მოადგილეები - გიორგი გოგაძე და გიორგი გაბიტაშვილი, უზენაესი სასამართლოს თავმჯდომარე ნინო გვენეტაძე, იუსტიციის სამინისტროს, სასჯელაღსრულებისა და პრობაციის სამინისტროს, შინაგან საქმეთა სამინისტროს ხელმძღვანელი თანამდებობის პირები, სასამართლოს, სახელმწიფო უწყებების, საერთაშორისო და არასამთავრობო ორგანიზაციების წარმომადგენლები ესწრებოდნენ.

კონფერენციაზე არასრულწლოვანთა მართლმსაჯულების სფეროში პროკურატურის მუშაობის შედეგები, არასრულწლოვანთა დანაშაულის გამომწვევი მიზეზების ამსახველი ანალიზი, პროკურატურის მიერ არასრულწლოვანთა მიმართ განხორციელებული სისხლის სამართლის პოლიტიკა, სისხლისსამართლებრივი დევნის ალტერნატიული მექანიზმების (განრიდება-მედიაციის) გამოყენების პრაქტიკა, განხორციელებული პრევენციული ღონისძიებები და არასრულწლოვანთა მართლმსაჯულების კოდექსის პრაქტიკაში მოქმედებასთან დაკავშირებული საკითხები იქნა წარმოდგენილი.

უკანასკნელ წლებში პროკურატურის მიერ გატარებული ღონისძიებების და საერთაშორისო ორგანიზაციების აქტიური მხარდაჭერის შედეგად მნიშვნელოვნად შემცირდა არასრულწლოვნებში აღკვეთის ღონისძიების სახით პატიმრობის გამოყენების მაჩვენებელი; გაიზარდა დევნის ალტერნატიული მექანიზმების (განრიდება-მედიაციის) გამოყენების მაჩვენებელი, რის შედეგადაც ასობით არასრულწლოვანს მიეცა ნასამართლობის გარეშე ცხოვრების გაგრძელების შესაძლებლობა; მომზადდა სახელმძღვანელო და რეკომენდაციები არასრულწლოვნებთან მუშაობის სპეციფიკის შესახებ;დაიხვეწა განრიდებისა და მედიაციის პროცედურები; გაძლიერდა განრიდება-მედიაციის კონტროლის მექანიზმები; განხორციელდა არაერთი პროექტი, რომელიც მიზნად ისახავდა არასრულწლოვნებში დანაშაულის პრევენციას და სამართლებრივ საკითხებზე მათი ცნობიერების ამაღლებას. ასევე განხორციელდა პროკურორთა სპეციალიზაცია არასრულწლოვანთა მართლმსაჯულებაში.