პერუს რესპუბლიკაში საქართველოს საპატიო საკონსულო გაიხსნა, სადაც საქართველოს საგანგებო და სრულუფლებიანმა ელჩმა, ოთარ ბერძენიშვილმა პერუს რესპუბლიკაში საქართველოს საპატიო კონსულს პილარ დეზას, შესაბამისი კანონმდებლობის გათვალისწინებით, ოფიციალურად გადასცა პერუს საგარეო უწყების მიერ ხელმოწერილი ეგზეკვატურა.

საკონსულოს გახსნის ცერემონიაზე ელჩმა საპატიო კონსულს წარმატებები უსურვა მის მომავალ საქმიანობაში და იმედი გამოთქვა, რომ პილარ დეზა, როგორც საქართველოს ინტერესების ოფიციალური გამტარებელი, კიდევ უფრო გააღრმავებს ორ ქვეყანას შორის არსებულ თანამშრომლობას და გაზრდის საქართველოს ცნობადობას მთელი ქვეყნის მასშტაბით.
პილარ დეზამ თავის მხრივ გამოხატა მადლიერება მინიჭებული ნდობისათვის და დაადასტურა სრული მზაობა ორ ქვეყანას შორის არსებული თანამშრომლობის განმტკიცების საქმეში, რომელიც ხალხებს შორის დაახლოებას და ბიზნესს წრეების ურთიერთობების განვითარებას ეფუძნება.

ოთარ ბერძენიშვილმა საქართველოს მთავრობის და ხალხის სახელით მადლობა გადაუხადა საპატიო კონსულს მიმდინარე წლის 13-14 ივნისს, ქ. თბილისში მომხდარი წყალდიდობის შედეგად დაზარალებული საქართველოს მოსახლეობის მიმართ სოლიდარობის გამოხატვის მიზნით, ქ. ლიმაში საქველმოქმედო ღონისძიების ორგანიზებისათვის.