პრემიერ-მინისტრს შერჩეული ჰყავს რამდენიმე კანდიდატურა, რომლებსაც "რესპუბლიკელი" მინისტრების შემცვლელებად განიხილავს, როდესაც ისინი თანამდებობას დატოვებენ.ამის შესახებ გიორგი კვირიკაშვილმა ტელეკომპანია "იმედის" ეთერში განაცხადა. თუმცა, ის აქცენტს აკეთებს იმაზე, რომ მინისტრების გათავისუფლებას თავად არ გეგმავს და მათ გადაწყვეტილებას ელოდება.

”რომ ვთქვა ახლა, რომ შერჩეული არ მყავს მათი შემცვლელები, არასერიოზული იქნება იმიტომ, რომ ზუსტად ვიცი, მოსალოდნელია მათი წასვლა. თუმცა, მათ ამაზე არ უსაუბრიათ, წავლენ თუ არა არჩევნებამდე. მაგრამ ჩემი მოვალეობაა, რომ ვიფიქრო და, რა თქმა უნდა, მყავს გარკვეული კანდიდატურების ჩამონათვალი, რომლებსაც ამ სამ თანამდებობაზე განვიხილავ”, - განაცხადა პრემიერ-მინისტრმა და დასძინა, რომ "კარგი იქნება, თუ ვარშავის სამიტზე თინა ხიდაშელი წავა".

ამასთან, გიორგი კვირიკაშვილის თქმით, წინასაარჩევნოდ კაბინეტში ცვლილებები გამორიცხული არ არის.