პრეზიდენტისთვის ე.წ. კაბელების საქმის მსჯავრდებულების შეწყალების მოთხოვნას თავისუფალი დემოკრატები არ გეგმავენ. პარტიის ლიდერმა დღეს ყველა პოლიტიკურ სუბიექტს მადლობა გადაუხადა, ვინც ამ მხრივ აქტიურობს.

„საქართველოს პრეზიდენტი ვიცი, რომ ძალიან შეწუხებულია ამ ადამიანების ბედით და ის საკუთარ გადაწყვეტილებებს მიიღებს,“ - აცხადებს ირაკლი ალასანია.

როგორც ოპოზიციაში მიაჩნიათ, მთავარია სასამართლო სისტემა გათავისუფლდეს იმ წნეხისგან, რომელსა ყოფილი პრემიერი, ბიძინა ივანიშვილი ახორციელებს.  

„შეწყალებები, პრეზიდენტის ჩარევა, ეს მუდმივად ვერ მოხდება და საქმეს ვერ უშველის. მთავარია, თავად სასამართლო გათავისუფლდეს იმ პოლიტიკური წნეხისგან, რომელიც ბიძინა ივანიშვილმა დაატეხა თავს,“ - აღნიშნა ნაციონალური მოძრაობის წევრმა, პეტრე ცისკარიშვილმა.

როგორც ცნობილია, კაბელების საქმეზე მსჯავრდებულების შეწყალების თხოვნით დღეს პრეზიდენტს ეროვნულმა ფორუმმა მიმართა.