1-ელი ივნისიდან ბათუმის საბაგირო “არგოს“ ტარიფები 50 %-ით იზრდება. საბაგიროთი სარგებლობა 10 ლარის ნაცვლად 15 ლარი გახდება. ტარიფი გაძვირდება ბავშვებისთვისაც. ამ შემთხვევაში ფასი 5 ლარი გახდება. კომპანიაში ცვლილებებს ფასებთან დაკავშირებით, საბაგიროს მოვლა-პატრონობის ხარჯებს უკავშირებენ. შესამაბისი განცხადებები უკვე გამოკრულია საბაგიროს ტერიტორიაზე. 

„ფასი ავწიეთ არა ჩვენი კომფორტის გამო, არამედ იმიტომ, რომ არ გაგვეჩერებინა საბაგირო. თუ ჩვენ არ გვექნება შესაბამისი თანხები, იმისათვის რომ ექსპლუატაცია შევძლოთ, საბაგიროს ხომ არ გავაჩერებთ? რათქმა უნდა რისკი არის იმისა, რომ შემცირდეს ვიზიტორთა რაოდენობა, მაგრამ პარალელურად ვცდილობთ მაღლა, სადაც გასართობი ცენტრია ის უფრო მეტად დავტვირთოდ“, აცხადებს კომპანია „ჰესტოკ-ბათუმი“ს დირექტორი  გიორგი აბაშიძე.

შეგახსენებთ, რომ საბაგირო გზის სისტემა ავსტრიული კომპანია „დოპპელმაიერის“ მიერაა დაპროექტებული. გზის სიგრძე 2586 მეტრია და მასზე მუდმივად 8 ადგილიანი 9 გონდოლა (დახურული ტიპის კაბინები) (5 მ/წმ-ით სიჩქარით) მოძრაობს.

ერთი მიმართულებით გზის დაფარვა შესაძლებელია 10 წუთში, ერთი საათის განმავლობაში კი საბაგიროს 245 ადამიანის მომსახურება შეუძლია.

კულტურულ გასართობი ცენტრი „არგო“ წარმოადგენს სანახაობრივ კომპლექსს, რომელიც მდებარეობს ბათუმში, ანურიის მთაზე ზღვის დონიდან დაახლოებით 250მ სიმაღლეზე. კომპლექსი მოიცავს რესტორნებს, კაფეებს, სავაჭრო ერთეულებს, ღია დარბაზებს, პოდიუმისა და სახურავის ტერასებს.